मुकेश जबदैता सिरहा, बरियारपट्टी— सिरहा जिल्लाको बरियारपट्टी गाउँपालिका–१ कचनारी बरहरीमा चितुवाको आतंकका कारण स्थानीयवासी त्रसित भएका छन्। गाउँमा प्रवेश गरेको चितुवाले गाईवस्तु तथा पशुचौपायामा आक्रमण गरी क्षति पुर्याएको छ भने मानवीय क्षतिको उच्च जोखिम बढेको छ।
स्थानीयका अनुसार पछिल्ला केही दिनयता चितुवाले लगातार गाउँमा देखापर्दै घरपालुवा जनावरहरूलाई आक्रमण गरेको छ। खासगरी रातिको समयमा चितुवाको गतिविधि बढी सक्रिय रहेको बताइएको छ। यसले गर्दा गाउँमा आवतजावत प्रभावित भएको छ भने स्थानीयहरू रातभर जाग्राम बस्न बाध्य छन्।
चितुवाको आतंकका बाबजुद पनि सम्बन्धित निकायले नियन्त्रण तथा रोकथामका लागि कुनै प्रभावकारी कदम नचालेको भन्दै स्थानीयहरूले गुनासो गरेका छन्। उनीहरूले स्थानीय प्रशासन, डिभिजन वन कार्यालय सिरहा तथा गाउँपालिका प्रशासनले कुनै चासो नदेखाएको आरोप लगाएका छन्।
एक स्थानीयले भने, “गाउँमा चितुवा खुलेआम घुम्दैछ। गाईबस्तु मार्दैछ, बालबच्चा एक्लै हिँड्न डराउनुपरेको छ। तर, अहिलेसम्म न सरकारको चासो देखियो, न त वन विभागका कर्मचारी आए।”
स्थानीय बासिन्दाहरूले चितुवाको नियन्त्रणका लागि तत्काल आवश्यक उपायहरू अवलम्बन गर्न आग्रह गरेका छन्। साथै, यस विषयमा प्रशासनले तत्काल पहल नगरे गम्भीर मानवीय क्षति हुन सक्ने भन्दै चासो व्यक्त गरेका छन्।
चितुवा नियन्त्रण तथा व्यवस्थापनका लागि सम्बन्धित निकायले के कस्ता कदम चाल्नेछ भन्ने बारेमा डिभिजन वन कार्यालय तथा स्थानीय प्रशासनको औपचारिक प्रतिक्रिया भने आउन बाँकी छ।
