महेश सिंह, सिरहा- स्वस्थ जीवनशैलीको प्रवर्द्धन गर्ने उद्देश्यले सिरहाको सुखीवानककटी गाउँपालिकामा भव्य योग शिविर सम्पन्न भएको छ। श्री जनता आधारभूत विद्यालय, महदेवा पोतोहामा आयोजित उक्त शिविर २०८१ चैत ४ गतेदेखि ६ गतेसम्म सञ्चालन भयो।
शिविरको संयोजन नागरिक आरोग्य सेवा केन्द्र (आयुर्वेद), महेशवारी, सिरहाले गरेको थियो भने आयोजकको भूमिकामा सुखीवानककटी गाउँपालिका रहेको थियो। बिहान ६:०० बजे सुरु हुने यस शिविरमा योग अभ्यासका साथै विभिन्न स्वास्थ्यसम्बन्धी सत्रहरू सञ्चालन भए।
“जसले योग गर्छ, ऊ स्वस्थ रहन्छ” भन्ने नाराका साथ आयोजित शिविरमा स्थानीय बासिन्दाहरूको उल्लेखनीय उपस्थिति रह्यो। प्रमुख अतिथि गाउँपालिका अध्यक्ष केदारनाथ यादवले योगलाई जीवनशैलीसँग जोड्न आवश्यक रहेको बताए। उनले भने, “यस शिविरमा सहभागी प्रत्येक व्यक्ति भोलिको लागि प्रशिक्षित भएका छन्। योगले रोगमुक्त जीवनको आधारशिला निर्माण गर्छ।”
शिविरका लागि काठमाडौंबाट आएका दुई जना योग प्रशिक्षकहरूले विभिन्न योगासन, ध्यान तथा स्वास्थ्य लाभदायी अभ्यासहरू सिकाएका थिए। प्रमुख प्रशासकीय अधिकृत राजीव झाले योगको महत्त्वबारे प्रकाश पार्दै भने, “नियमित योग अभ्यासले जीवनशैलीमा सकारात्मक परिवर्तन ल्याउनुका साथै निरोगी जीवन बिताउन सहयोग गर्छ।”
कार्यक्रममा गाउँपालिकाकी उपाध्यक्ष निलम यादव, शिक्षा शाखा प्रमुख भोगेन्द्र यादवलगायत विभिन्न अतिथिहरूको उपस्थिति रहेको थियो। आयोजकका अनुसार स्थानीयवासीहरूले शिविरलाई ऐतिहासिक भन्दै यस्ता स्वास्थ्य प्रवर्द्धनात्मक कार्यक्रमहरू आगामी दिनमा निरन्तर सञ्चालन गर्नुपर्ने माग गरेका छन्।
सहभागीहरूको अनुसार शिविरले स्वास्थ्यप्रति जागरूकता बढाउनुका साथै दैनन्दिन जीवनमा योगलाई समावेश गर्ने प्रेरणा दिएको छ। सहभागीहरूले शिविरबाट सिकेका अभ्यासहरूलाई निरन्तर जारी राख्ने प्रतिबद्धता व्यक्त गरेका छन्।
