महेश सिंह सिरहा लहान – सिरहा निर्वाचन क्षेत्र नम्बर–१ बाट स्वतन्त्र उम्मेदवार सन्तोष सिल्वाल गिरीले औपचारिक रूपमा उम्मेदवारी दर्ता गराएका छन्। उनी सामाजिक चिन्तक तथा प्रखर बौद्धिक नेता स्वर्गीय प्रदीप गिरीका सुपुत्र हुन्।
उम्मेदवारी दर्तापछि लहानमा पत्रकारहरूसँग कुरा गर्दै गिरीले आफू मन्त्री बन्ने लक्ष्य लिएर राजनीतिमा नआएको स्पष्ट पारे। “मलाई मन्त्री बन्नु छैन, राजनीतिले के हो भन्ने कुरा बुझाउन र सुधार गर्न उम्मेदवारी दिएको हुँ,” उनले भने, “बिरासत बोकेका एमाले, कांग्रेस, माओवादी र जसपाका केही नेताहरूले राजनीतिलाई कमाउने भाडो र व्यापारको रूपमा प्रयोग गरेको देख्दा दुःख लागेको छ।”
उनले राजनीति व्यापार होइन, साधना र सेवाको मार्ग भएको व्याख्या गर्दै जनतासँग प्रत्यक्ष जोडिने राजनीतिक संस्कारको आवश्यकता औंल्याए। लहान र सिरहामा समाजसेवामार्फत जनतासँग नजिक भएर काम गर्ने आफ्नो चाहना रहेको उनको भनाइ थियो।
उम्मेदवार गिरीले आफ्नो उम्मेदवारी शिक्षा, स्वास्थ्य र कृषिमा आधुनिक विकास तथा लहान–सिरहाका नागरिकलाई गुणस्तरीय स्वास्थ्य सेवामा सहज पहुँच सुनिश्चित गर्ने उद्देश्यका साथ रहेको बताए। “यी क्षेत्रको सुधारबिनासम्म समग्र विकास सम्भव छैन,” उनले भने।
उनले आफ्नो चुनावी अभियान निरन्तर जारी रहेको जानकारी दिँदै रिक्सा छापबाट चुनाव लड्ने बताए। “यो उम्मेदवारी बुबाको सपना साकार पार्ने प्रयास हो,” भन्दै उनले स्वर्गीय प्रदीप गिरीले देखाएको मूल्य, निष्ठा र वैचारिक राजनीतिको बाटोमा आफू अघि बढ्ने प्रतिवद्धता जनाए।
पत्रकार मनोज बनैता र महेश सिंहसँगको कुराकानीमा उनले बुबाको राजनीतिक भूमिकाबाट प्रेरित भएर स्वच्छ र विचारप्रधान राजनीतिलाई निरन्तरता दिन चाहेको बताए।
स्थानीयवासीहरूका अनुसार सन्तोष सिल्वाल गिरी सिरहा–१ मा चर्चित र अर्थपूर्ण उम्मेदवारका रूपमा हेरिएका छन्। उनका पिता प्रदीप गिरी नेपाली राजनीतिमा मात्र नभई अन्तर्राष्ट्रियस्तरमै बौद्धिक व्यक्तित्वका रूपमा परिचित थिए, जसको प्रभाव अहिले पनि व्यापक रूपमा महसुस गरिन्छ।
