सिरहा, २० भाद्र । आसन्न मंसिर ४ को आमचुनावका लागि जनता समाजवादी पार्टी नेपालबाट सिरहा निर्वाचन क्षेत्र नं. ४ (ख) बाट मधेश प्रदेशका सांसद एवं पूर्वराज्यमन्त्री सुरेश मण्डल सिफारिस भएका छन् ।
जसपाको सिरहा निर्वाचन क्षेत्र नं. ४ ले पूर्वराज्यमन्त्री मण्डललाई आगामी चुनावका लागि प्रत्यक्ष उम्मेद्वारको रुपमा सिफारिस गरेको हो ।
मण्डल यसअघि वि.सं. २०७४ को आमचुनावमा तत्कालीन राष्ट्रिय जनता पार्टी नेपालबाट सिरहा ४ (ख)बाट भारी मतान्तरका साथ विजयी भएका थिए ।
युवामाझ लोकप्रिय एवं बौद्धिक नेताको रुपमा मण्डल परिचित छन् । मधेश आन्दोलनदेखि विभिन्न आन्दोलनहरुमा मण्डलले सक्रिय सहभागिता जनाउँदै आएका छन् ।
विद्यार्थी राजनीतिबाट संसदीय राजनीतिसम्म आइपुग्दा उनी एक इमान्दार, स्वच्छ छवि र बौद्धिक युवा नेताको रुपमा देखिँदै आएका छन् ।
मधेश र समग्र राष्ट्रकै हितमा उनी जोसँग पनि तार्किक बहस गर्न सक्ने क्षमताका व्यक्तित्व मण्डलले राजनीतिलाई पेशाभन्दा पनि समाजसेवाको रुपमा लिएको बताउँछन् ।
उनी मधेश प्रदेशको राज्यमन्त्री हुँदा आफ्नो निर्वाचन क्षेत्रलगायत प्रदेशभरि नै चर्चित अनुहारको रुपमा देखिएका थिए ।
