सिरहा । अरुको हस्ताक्षर किर्ते गरी बैंकबाट कसैले पैसा निकाल्न सक्छन् भन्ने कुरा अपत्यारिलो लाग्न सक्छ । सुन्दा अचम्मित तुल्याउने, तर यथार्थ ।
सिरहामा यस्तै एउटा घटना सार्वजनिक भएको छ । सिरहा सन्हैठाका पप्पु यादव र मिर्चैयाका जिमी यादव (जसपा अध्यक्ष, मिर्चैया) संयुक्त रुपमा एक्मी इन्जिनियरिङ कन्स्ट्रक्सन एण्ड कन्सलटेन्सी नामक कम्पनी सञ्चालन गरे ।
उक्त कम्पनी र माछापुच्छ्रे बैंकबीच दुई वर्षअघि मूल्यांकनकर्ताको सहमति भयो । यसका लागि कम्पनीले सुरुमा बैंकमा ३ लाख रुपैयाँ धरौटी राख्नुपर्ने हुन्छ । उनीहरूले दुबै जनाको संयुक्त रुपमा हस्ताक्षर चल्ने गरी माछापुच्छ्रे बैंकमा खाता खोलेर तत्काल ३ लाख रुपैयाँ जम्मा गरे ।
जसमा २ लाख जिमीको थियो भने १ लाख पप्पुको थियो । तर, बैंकले चेक भने आजै बन्न नसक्ने भन्दै अर्को दिन आएर लैजान बतायो । केहि दिनपछि पप्पु बैंक पुगे । चेक जिमीले लगिसकेको जानकारी पप्पुलाई बैंकले दियो ।
पप्पु घर फर्किए र त्यसपछि साथी भएकाले चेकबारे खासै सोधखोज गरेनन् । नवीकरण गराउन पैसा लाग्ने भएकाले झण्डै दुई वर्षपछि पुष ३ गते पप्पुले जिमीलाई पैसा निकालौं भनेर फोन गरे । तर, जिमीले केहि दिनपछि निकालौंला भन्ने जवाफ दिए । त्यसपछि पप्पुले पुष ७ गते कति पैसा छ भन्ने जानकारी लिन बैंकमा फोन गरे ।
बैंकबाट जवाफ आयो – दुई हजार । पप्पु आश्चर्यचकित भए । बैंकले ब्याजसमेत गरेर यसअघि खातामा ३ लाख १७ हजार रकम रहेकोमा जिमीले ३ लाख १५ हजार रुपैयाँ खाताबाट झिकेको जानकारी पप्पुलाई गरायो । जबकि पप्पुले चेकमा हस्ताक्षर गरेकै थिएनन् ।
पप्पुले तुरुन्तै जिमीलाई फोन गरे । उनले सुरुमा पोल खुल्ने भयले आफूले पैसा झिकेको स्वीकार पनि गरेनन् । तर, कुरा हुँदै जाँदा उनले ‘तपाईंको हस्ताक्षर पनि मैले नै गरी पैसा निकालेको हुँ’ भनेर पप्पुसँग स्वीकारेका छन् ।
माछापुच्छ्रे बैंक मिर्चैया शाखाका प्रमुख देवेन्द्र कोइरालाले पनि पैसा निकालिएको पुष्टि गरे । तर, हस्ताक्षर बारे उनले अनभिज्ञता जनाए । जिमीसँग यस विषयमा कुरा गर्दा उनी भने पैसा आफूले खाताबाट निकालेको भएपनि हस्ताक्षर पप्पुकै रहेको दावी गरे ।
आफ्नो किर्ते कर्तुतको पोल खुलेपछि अहिले जिमी पप्पुलाई फकाउने प्रयासमा लागेका छन् । तर, पप्पुले हस्ताक्षर किर्ते गरी बैंकबाट पैसा झिक्नु अपराध भएको भन्दै आफू कानुनी प्रक्रियामा जाने बताएका छन् ।
