काठमाडौं । तपाईं ओटीटी प्लाटफर्मलाई पछ्याउनुहुन्छ भने यो साता नयाँ फिल्म र सिरिज आउने क्रममा छन् । नेटफ्लिक्स, अमेजन प्राइम भिडियो, डिज्नीप्लस हटस्टार सहितका प्लाटफर्मले दर्शकका लागि नयाँ सिरिज, फिल्म र शो ल्याउँदैछन् ।
यो सप्ताहन्तमा ‘द ग्रेट इण्डियन कपिल शो’को दोस्रो सिजनदेखि दुई साताअघि हलमा लागिसकेको ‘थंगलान’सम्म सूचीमा छन् । होस्ट कपिल शर्मा आफ्नो चर्चित शो लिएर पुनः दर्शकमाझ आउनेछन् ।
दोस्रो सिजनमा आलिया भट्ट, सैफअली खान, करण जोहर, जान्ह्वी कपुर, जुनियर एनटीआर, टी-२० वर्ल्डकप च्याम्पियन्सका खेलाडी र बलिउड सेलिब्रेटीका पत्नी अतिथिको रुपमा आउनेछन् ।
सेप्टेम्बर २० मा नेटफ्ल्क्सिमा एउटा नयाँ फिल्म आउनेछ जसको नाम हो– हिज थ्री डटर्स । हराएका तीन बहिनी न्युयोर्कको एक अपार्टमेन्टमा आफ्ना बिरामी बुवालाई अन्तिमपटक भेट्न पुनर्मिलन गर्छन् । क्यारी कुन, एलिजाबेथ ओल्सेन र नताशा लियोन स्टारर यो फिल्ममा पारिवारिक कथावस्तु समावेश छ ।
नेटफ्ल्क्सिमा धनाढ्य तथा माइक्रोसफ्टका संस्थापक बिल गेट्सबारेको डकुमेन्ट्री ‘ह्वाट्स नेक्स्ट : द फ्युचर विथ बिल गेट्स’ पनि स्ट्रिमिङ सुरु भएको छ । यो डकुमेन्ट्रीमा गेट्सले अहिलेको संसारले भोगिरहेका प्रमुख चुनौतीबारे कुरा गरेका छन् ।
नेटफ्लिक्समै विक्रम चियान स्टारर दक्षिण भारतीय फिल्म ‘थंगलान’को पनि स्ट्रिमिङ सुरु भएको छ । पा रञ्जित निर्देशित यो फिल्मले प्राकृतिक स्रोत र आदिवासी संस्कृति जोगाउन गर्ने संघर्षको कथा भन्छ । यो एक्सनप्रधान फिल्ममा विक्रम, माल्भिका मोहन र पार्वती थिरुभोतुको अभिनय छ ।
जियो सिनेमामा यो साता रोबर्ट प्याटिन्सन स्टारर हलिउड फिल्म ‘द ब्याटम्यान’ (२०२२)को स्पिन–अप सिरिज ‘द पेन्गुइन्स’को स्ट्रिमिङ सुरु भएको छ । तपाईंले ब्याटम्यान सिरिज नियमित हेर्नुहुन्छ भने यसले गोथाम नामक सहरको अपराधको कथा भन्छ ।
जियो सिनेमामा परेश रावल अभिनित ‘जो तेरा है, वो मेरा है’ रिलिज भएको छ । यो फिल्मको कथा चिया विक्रेताको वरपर घुम्छ । यसमा परेशसहित अमित सायल र सोनाली कुलकर्णीको अभिनय छ । यो साता नेटफ्लिक्समा जापानी फिल्म ‘द क्वीन अफ भिलियन्स’ पनि स्ट्रिमिङ सुरु भएको छ ।
