महेश सिंह लहान – गोलबजार नगरपालिका–१३, दुर्गापुरका किसान दुर्गेश महतोले अनौठो प्रजातिको काउली उत्पादन गरी बजारमा बिक्रीका लागि राखेका छन्। तीन भिन्न प्रजातिका काउलीमध्ये सेतो, पहिलो र उत्कृष्ट गुणस्तरको काउली देखेर उपभोक्ताहरू अचम्मित भएका छन्।
लामो समयदेखि कृषि पेशालाई जीविकोपार्जनको मुख्य आधार बनाउँदै आएका महतो तरकारी खेतीबाट मनग्य आम्दानी गरिरहेका छन्। उनले परम्परागत खेतीलाई परिमार्जन गर्दै नवीन प्रविधिको प्रयोगमार्फत उत्पादनमा विविधता ल्याएका हुन्।
तर, कृषि क्षेत्रलाई मुख्य पेशा बनाए पनि किसान महतोले सरकारको अनुदान र सहयोग प्राप्त गर्न कठिन रहेको गुनासो गरेका छन्। “वास्तविक किसानका लागि अनुदान पाउन निकै कठिन छ,” उनले भने, “सरकारी योजनाहरू कागजमै सीमित छन्, हामीजस्ता साना किसानहरूलाई वास्तविक रूपमा सहयोग पुर्याउनुपर्छ।”
उनले मधेस प्रदेश सरकारलाई किसानहरूको समस्या प्रति गम्भीर ध्यान दिन आग्रह गरेका छन्। कृषि उत्पादनमा नयाँ प्रयोग र मेहनत गर्दै आएका किसानहरूले बीउ, मल र सिंचाइजस्ता आधारभूत सुविधामा भोग्नु परिरहेको समस्याको उचित समाधान खोज्नुपर्ने उनी बताउँछन्।
स्थानीयस्तरमै उत्पादन वृद्धि गर्दै बजारमा फरक पहिचान बनाएका महतोले कृषिलाई आधुनिकीकरण गर्दै आत्मनिर्भर बनाउन सरकार र सम्बन्धित निकायहरूको सक्रिय भूमिकाको अपेक्षा गरेका छन्।
