काठमाडौं । अमेरिकी राष्ट्रपति डोनाल्ड ट्रम्पले फेरि एकपटक क्यानडाले भन्सार शुल्कबाट बच्न अमेरिकाको ‘राज्य’ बन्न सक्ने बताएका छन् ।
ट्रम्पले भने, “हाम्रो क्यानडासँग ठूलो व्यापार घाटा छ। हामी यसलाई अब जारी राख्न दिन सक्दैनौं। तपाईंलाई थाहा छ मैले सधैं भनेको छु कि तपाईं राज्य बन्न सक्नुहुन्छ भने, त्यहाँ कुनै व्यापार घाटा हुनेछैन र हामी तपाईंमाथि कर लगाउने छैनौं।”
अमेरिकी राष्ट्रपतिले क्यानडासँग व्यवहार गर्न वर्षौंदेखि गाह्रो भएको बताए। ट्रम्पले भने, “२०० बिलियन डलर वा २५० बिलियन डलरको व्यापार घाटा हुनु उचित होइन। हामीलाई कार बनाउन उनीहरू (क्यानडा) को आवश्यकता छैन।”
उनले भने, ‘हामीलाई उनीहरुबाट तेल र ग्यास चाहिँदैन । हामीसँग यो अरू कसैको भन्दा बढी छ।’ ट्रम्पले यसअघि नै क्यानडा अमेरिकाको ५१ औ राज्य बनेमा ६० प्रतिशतभन्दा बढी कर कटौती हुनसक्ने बताइसकेका छन् ।
डोनाल्ड ट्रम्पले भर्खरै भनेका थिए ‘जबसम्म अवैध आप्रवासीहरू र गैरकानूनी रूपमा निर्मित फेन्टानिलहरू अमेरिकी सीमाहरूबाट देशमा आउन बन्द गर्दैनन्, क्यानडाबाट आउने सामानहरूमा २५ प्रतिशत कर लाग्नेछ।’
