ओशो दर्शन, ध्यान सामग्री र पुस्तकहरू प्रति उत्साहजनक चासो
महेश सिंह लहान, सिरहा –ओशो माधुर्य ध्यान केन्द्रको आयोजनामा सिरहाको लहानमा दुईदिने ओशो साहित्य प्रदर्शनी सम्पन्न भएको छ। फागुन ५ र ६ गते (फेब्रुअरी १७ र १८) आयोजना गरिएको उक्त प्रदर्शनीमा ओशोका विभिन्न नेपाली, हिन्दी र अंग्रेजी भाषाका साहित्यिक कृतिहरू प्रदर्शन तथा बिक्री गरियो।
ध्यान र अध्यात्ममा रुचि राख्ने मानिसहरूलाई लक्षित गरी गरिएको यो प्रदर्शनीमा ओशोको दर्शन, जीवनशैली तथा ध्यान प्रविधिसम्बन्धी पुस्तकहरू उपलब्ध गराइएका थिए। साथै, मेडिटेशन चेयर, ध्यानसम्बन्धी पोस्टर, तस्बिरहरू समेत प्रदर्शन गरियो। आयोजकका अनुसार, स्थानीय तथा अन्य स्थानबाट आएका ओशोप्रेमीहरूको उल्लेख्य सहभागिता रहेको थियो।
उद्घाटन समारोहमा मधेस प्रदेश सभा सदस्य राजेन्द्रप्रसाद चौधरी, सपटेक कलेजका संस्थापक प्रिन्सिपल डा. महादेव साह, मानव अधिकारकर्मी देवराज पोखरेल तथा ओशो आश्रमका दर्जनौं प्रतिनिधिहरूको उपस्थिति रहेको थियो। उनीहरूले ध्यान र अध्यात्म जस्तो विषय समाजमा अझै प्रचार-प्रसार गर्नुपर्नेमा जोड दिएका थिए।
प्रदर्शनीमा आएका सहभागीहरूले ओशो दर्शनबारे जानकारी लिँदै विभिन्न पुस्तकहरू अध्ययन गरे। कतिपयले ध्यानसम्बन्धी सामग्रीहरू खरिद गरेका थिए भने केहीले ओशोको पुस्तकहरूबारे जिज्ञासा राख्दै आफ्नो जीवनशैलीमा ध्यानलाई कसरी समाहित गर्न सकिन्छ भन्ने विषयमा छलफल गरे।
कार्यक्रममा स्वामी अनुग्रह, स्वामी जीवन पाहुना (राजु स्वामी) र मनिष लगायतका साधक तथा अध्यात्मप्रेमीहरू सक्रिय रहेका थिए। आयोजक संस्थाका प्रतिनिधिहरूका अनुसार यो प्रदर्शनी दुई दिनसम्म सञ्चालन हुनेछ, जसले ध्यान तथा अध्यात्मप्रति आम मानिसको चासो बढाउने विश्वास गरिएको छ।
ओशो माधुर्य ध्यान केन्द्रका पदाधिकारीहरूले यस्ता कार्यक्रमलाई निरन्तरता दिँदै जाने बताएका छन्। उनीहरूले ध्यान, प्रेम र मुक्तिको बाटो समेट्ने ओशोका विचारहरू समाजमा फैलाउने उद्देश्यले यस्ता प्रदर्शनीहरू आयोजना गरिने बताए।
स्थानीय बासिन्दा तथा विभिन्न क्षेत्रका व्यक्तिहरूले यो प्रदर्शनीप्रति रुचि देखाएका थिए। एक स्थानीय सहभागीका अनुसार, “ओशोका पुस्तकहरू केवल आध्यात्मिक मात्र नभई, जीवन जिउने कलासँग पनि जोडिएका छन्। यस्ता प्रदर्शनीहरूले मानिसहरूलाई नयाँ सोच दिन मद्दत गर्छ।”यो प्रदर्शनीले ओशो दर्शनप्रति अझै चासो र चेतना फैलाउने विश्वास आयोजकले व्यक्त गरेका छन्।
