महेश सिंह लहान, सिरहा – जनता समाजवादी पार्टी (जसपा) नेपाल अन्तर्गत नरहा गाउँपालिका–३ को बैठक शनिबार जसपा नेता विजय यादवको निवासमा सम्पन्न भएको छ। बैठकको अध्यक्षता गाउँपालिका पार्टी अध्यक्ष बद्री नारायण यादवले गर्नुभएको थियो।
बैठकमा जसपा नेपालका केन्द्रीय सदस्य तथा DOTIM अध्यक्ष चन्देश्वर पासवान प्रमुख अतिथिका रूपमा सहभागी रहनुभएको थियो भने केन्द्रीय सदस्य त्रिपुरा झा विशिष्ट अतिथिका रूपमा उपस्थित रहनुभएको थियो। कार्यक्रममा भ्रातृ संगठनका नेतागण, वडा नं. ५ का पार्टी अध्यक्षहरू, जिल्ला सदस्यहरू, महिला नेतृहरू, पत्रकारहरू तथा समाजका अगुवा र भद्रभलाद्मीहरूको उल्लेखनीय उपस्थिति रहेको थियो।
बैठकमा यही पुष ७ गते गोलबजारस्थित व्यापार हलमा आयोजना हुन लागेको DOTIM को कार्यक्रमका विषयमा विशेष छलफल गरिएको थियो। उक्त कार्यक्रममा जसपा नेपालका संघीय परिषद् अध्यक्ष माननीय उपेन्द्र यादव प्रमुख अतिथिका रूपमा सहभागी हुने तय भएको छ। सोही दिन ‘न्यू चोहर्बा’ क्षेत्रमा आयोजना गरिने स्वागत कार्यक्रमको तयारीबारे पनि विस्तृत रूपमा छलफल गरिएको थियो।
यसका साथै पार्टी संगठन विस्तार, जनआधार मजबुत बनाउने रणनीति तथा आगामी दिनमा आयोजना गरिने नरहा गाउँपालिका स्तरीय विस्तारित बैठकका विषयमा समेत गहन छलफल भएको आयोजकले जनाएको छ।
