महेश सिंह लहान, सिरहा । जलवायु परिवर्तनका कारण कृषि क्षेत्रमा देखिँदै गएका चुनौतीहरूको सामना गर्न स्थानीय स्तरमा सक्षम नेतृत्व विकास गर्ने उद्देश्यले लहानमा दुई दिने ‘जलवायु च्याम्पियन क्षमता विकास अभिमुखीकरण तालिम’ सम्पन्न भएको छ।
जलवायु मैत्री गाउँ परियोजना (CSUN) अन्तर्गत राष्ट्रिय कृषक समूह महासंघ नेपालको आयोजनामा तथा केयर नेपालको सहयोगमा जेठ ६ र ७ गते सञ्चालन गरिएको तालिममा सिरहा र सप्तरीका महिला किसानहरूको उल्लेखनीय सहभागिता रहेको थियो।
कार्यक्रममा सिरहाको सखुवानान्कारकट्टी गाउँपालिका, लक्ष्मीपुर पतारी गाउँपालिका, धनगढीमाई नगरपालिका र भगवानपुर गाउँपालिकाका साथै सप्तरीको रुपनी गाउँपालिकाका महिला किसानहरू सहभागी भएका थिए। जलवायु परिवर्तनको प्रत्यक्ष प्रभाव कृषि र ग्रामीण समुदायमा पर्ने भएकाले महिला किसानहरूलाई जलवायु अनुकूलनका अभ्यास तथा नेतृत्व विकाससँग जोड्ने उद्देश्यले तालिम सञ्चालन गरिएको आयोजकले जनाएको छ।
दुई दिनसम्म सञ्चालन भएको तालिममा सहभागीहरूलाई जलवायु परिवर्तनले कृषि उत्पादनमा पारेको प्रभाव, जोखिम न्यूनीकरणका उपाय, जलवायु अनुकूल कृषि प्रविधि तथा वातावरणमैत्री खेती प्रणालीबारे जानकारी गराइएको थियो। साथै समुदायस्तरमा जलवायु सचेतना विस्तार गर्न आवश्यक नेतृत्व क्षमता, समन्वय र पैरवीका विषयमा समेत प्रशिक्षण प्रदान गरिएको थियो।
कार्यक्रमका प्रशिक्षक तथा सरोकारवालाहरूले जलवायु परिवर्तनको असर न्यूनीकरणका लागि स्थानीय समुदायको सक्रिय भूमिका अपरिहार्य रहेको उल्लेख गर्दै महिला किसानहरूलाई ‘जलवायु च्याम्पियन’को रूपमा स्थापित गर्ने प्रयासले दीर्घकालीन सकारात्मक प्रभाव पार्ने विश्वास व्यक्त गरेका छन्।
तालिममा सहभागी महिला किसानहरूले प्राप्त ज्ञान र सीपलाई आफ्ना गाउँ तथा कृषक समूहमा विस्तार गर्दै जलवायु अनुकूल कृषि अभ्यासलाई प्रवर्द्धन गर्ने प्रतिबद्धता जनाएका छन्।
आयोजकका अनुसार जलवायु परिवर्तनका चुनौतीबीच कृषि उत्पादनलाई दिगो, सुरक्षित र वातावरणमैत्री बनाउन यस्ता कार्यक्रमहरूले स्थानीय समुदायको क्षमता अभिवृद्धिमा महत्वपूर्ण योगदान पुर्याउने अपेक्षा गरिएको छ।
