महेश सिंह सिरहा लहान – लहान नगरपालिका–१ स्थित सिङ्गराही चोकमा रहेको माइलस्टोन एकेडेमीले विद्यार्थीलाई सहभागी गराउँदै विविध सांस्कृतिक कार्यक्रमसहित श्रीकृष्ण जन्माष्टमी पर्व मनाएको छ।
विद्यालयमा अध्ययनरत बालबालिकालाई राधा–कृष्णको स्वरूपमा सजाएर धार्मिक तथा सांस्कृतिक कार्यक्रम आयोजना गरिएको विद्यालयका संस्थापक तथा भाइस प्रिन्सिपल पाकर चौधरीले जानकारी दिए। बालबालिकालाई धर्म, संस्कृति र संस्कारबारे व्यवहारिक ज्ञान दिने उद्देश्यले कार्यक्रम आयोजना गरिएको उनको भनाइ छ।
विद्यालयले हरेक वर्ष विद्यार्थीलाई नेपाली धर्म, संस्कृति र परम्पराको संरक्षण तथा संवर्द्धनसँग जोड्दै विभिन्न पर्व औपचारिक रूपमा मनाउँदै आएको प्रिन्सिपल ताराकान्त चौधरीले बताए। ‘पुस्तकमा पढाइने विषयसँगै विद्यार्थीलाई आफ्नो धर्म, संस्कृति र संस्कारसँग परिचित गराउन यस्ता कार्यक्रमले महत्वपूर्ण भूमिका खेल्छ,’ उनले भने।
कार्यक्रममा विद्यार्थीहरूले भगवान् श्रीकृष्णसँग सम्बन्धित विभिन्न धार्मिक तथा सांस्कृतिक नृत्य प्रस्तुत गरेका थिए। राधा–कृष्णको भेषमा सजिएका बालबालिकाको प्रस्तुतिले कार्यक्रमलाई थप आकर्षक बनाएको थियो।
कार्यक्रममा शिक्षिकाहरू रोशनी चौधरी, निशा चौधरी, डोली साह, शिखा कर्ण र पुनम चौधरी तथा शिक्षकहरू सुरज मण्डल, अमित साह, अंग्रेजी शिक्षक परमेश्वर चौधरीलगायत शिक्षक–शिक्षिका र विद्यार्थीहरूको उल्लेखनीय सहभागिता थियो।
कार्यक्रमको अन्त्यमा विद्यालयले सहभागी सम्पूर्ण विद्यार्थीलाई खिर खुवाउँदै जन्माष्टमी उत्सव सम्पन्न गरेको जनाएको छ।
लहानको पुरानो शैक्षिक संस्थामध्ये रहेको माइलस्टोन एकेडेमीले नियमित पठनपाठनसँगै विद्यार्थीको सांस्कृतिक, नैतिक तथा व्यवहारिक विकासलाई समेत प्राथमिकता दिँदै आएको विद्यालयले जनाएको छ।
