फ्रान्स — इजरायलमाथि हमासको अक्रमण भएको केही दिनमै बिहीबार साँझ प्यालेस्टिनीहरुको समर्थनमा निकालिएको जुलुसलाई पेरिसको प्रहरीले पानीको फोहोरा र अश्रुग्यास प्रहार गर्दै हस्तक्षेप गरेको छ ।
इजरायलीहरुका पक्षमा सानासाना जुलुसहरु हरेक साँझ जस्तै निस्किन थालेपछि बिहीबार प्यालेस्टाइन समर्थकहरुले पनि पेरिसमा जुलुस निकालेका थिए ।
राजधानी पेरिसमा निकालिएको जुलुसलाई प्रहरीले हस्तक्षेप गरेको थियो । प्यालेस्टाइन समर्थकहरु सहजै तितरबितर नभएपछि जुलुसलाई अश्रुग्यास र पानीका फोहोरा हान्नुपरेको सुरक्षा अधिकारीहरुको भनाइ छ ।युरोपकै सबैभन्दा ठूलो यहुदी र मुस्लिम समुदाय फ्रान्समा रहेकाले हरेक दिनजस्तै यी दुई समुदायका पक्ष विपक्षमा समर्थन, नाराबाजी र विरोध हुँदै आएका छन् । यही विरोध र समर्थनका बीचमा द्वन्द्व थप भड्किने त्रासले बिहीबार फ्रान्सेली राष्ट्रपति इमानुयल म्याक्रोनले जनतालाई एकजुट र एकताबद्ध रहन आह्वान गरेका हुन् ।
फ्रान्समा प्यालेस्टाइनहरुको समर्थनमा नाराजुलुस गर्न प्रतिबन्धित छ । म्याक्रोनको भाषणको केही समय अघि फ्रान्सेली आन्तरिकमन्त्री जेराल्ड डार्मानिनले प्यालेस्टिनी समर्थन गर्ने प्रदर्शनहरूमा प्रतिबन्ध लगाउने घोषणा गरेका थिए। प्रतिबन्धको बाबजुद पनि सयौं समर्थक प्यालेस्टाइनी प्रदर्शनकारीहरू बिहीबार राति मध्य पेरिसमा छुट्टाछुट्टै समूहमा भेला भएका थिए । प्यालेस्टाईन समर्थकहरुले ‘इजरायल हत्यारा हो’ र ‘म्याक्रोन तीनका सहयोगी हुन्’ लगायतका नारा लगाएको बिहीबार साँझ फ्रान्सेली अखबार र टिभीहरुले प्रसारण गरेका छन् ।
बिहीबार एक टिभी कार्यक्रममा सम्बोधन गर्दै म्याक्रोनले शनिबार इजरायलमाथि भएको हमास आक्रमणमा १३ फ्रान्सेलीको ज्यान गएको र चार बालबालिकासहित १७ फ्रान्सेली बेपत्ता रहेको भन्दै फ्रान्सेली जनतालाई एकताबद्ध रहन आह्वान गरेका छन् ।म्याक्रोनले कुनै घटनालाई हेरेर, सुनेर अन्तर्राष्ट्रिय विभाजनलाई आफू अनुकूल व्याख्या गरेर राष्ट्रिय विभाजन गर्न नहुने उल्लेख गरेका छन् । म्याक्रोनले हमासले अपहरण गरेर कैदमा राखेका बन्धकहरूलाई रिहा गर्न सरकारले कुनैपनि कसर बाँकी नराख्ने आश्वाशन समेत दिएका छन् ।
‘म आज राति अपहरितका परिवारहरूसँग कुरा गर्छु र म उनीहरूलाई भन्न चाहन्छु कि फ्रान्सले इजरायली अधिकारीहरू र हाम्रा साझेदारहरूसँग उनीहरूलाई सुरक्षित रूपमा घर ल्याउनको लागि आफ्नो शक्ति अनुसार सबै लगाइरहेको छ,’ उनले भने । म्याक्रोनले ‘मध्यपूर्वको वर्तमान संकट समाधानको एक मात्र उपाय प्यालेस्टाइन राज्यको निर्माणसँगै इजरायललाई सुरक्षाको प्रत्याभूति दिनु’ रहेको समेत बताए ।
युरोपकै सबैभन्दा ठूलो यहुदी र मुस्लिम समुदाय फ्रान्समा रहेकाले बढ्दो इजरायल-प्यालेस्टाइन विवादका बिच फ्रान्समा अशान्ति मच्चिन सक्ने भयलाई साम्य पार्ने प्रयासस्वरुप म्याक्रोनको सम्बोधन आएको भनाइ फ्रान्सेली अखबारहरुको छ । फ्रान्स युरोपको सबैभन्दा ठूलो मुस्लिम र यहुदी संख्या भएको देश हो । इजरायल-प्यालेस्टाइन द्वन्द्वका बीचमा विगतमा यी दुईबीच तनाव हुने गरेको छ ।
मध्यपूर्वमा द्वन्द्वको फैलिएपछि त्यसलाई सम्बोधन गर्दै, म्याक्रोनले फ्रान्सेली माटोमा रहेका सबै नागरिकहरूको सुरक्षा गर्ने बाचा गर्दै भनेका छन्, ‘हाम्रो पहिलो कर्तव्य भनेको हाम्रो इलाकामा हाम्रा सबै नागरिकहरूको सुरक्षाको ग्यारेन्टी गर्नु हो । उनीहरूलाई कलंकित पार्ने कुनै पनि कार्यलाई रोक्नु हो। गणतन्त्र तपाईंको रक्षा गर्न कटिबद्ध छ ।’ ईकान्तिपुर
