महेश सिंह,लहान सिरहा– सिरहाको नवराजपुर गाउँपालिका–५, झाझपट्टी सुन्दरपुरस्थित आधारभूत विद्यालयमा नेपालीहरूको महान् चाड दसैँ, दीपावली तथा छठ पर्वको अवसरमा शुभकामना आदानप्रदान तथा अभिभावक भेला सम्पन्न भएको छ।
विद्यालय व्यवस्थापन समितिका अध्यक्ष भोगेन्द्र यादवको अध्यक्षता तथा गाउँपालिकाको शिक्षा शाखाका प्रतिनिधि महेश्वर यादवको प्रमुख आतिथ्यमा कार्यक्रम सम्पन्न भएको हो।
कार्यक्रममा विद्यालयको शैक्षिक गुणस्तर अभिवृद्धि, विद्यालयको स्तरोन्नति तथा भौतिक पूर्वाधार विकासका विषयमा छलफल गरिएको थियो। सहभागीहरूले विद्यालयमा आवश्यक भौतिक पूर्वाधार निर्माणका लागि स्थानीय सरकारले भवन निर्माणमा विशेष ध्यान दिनुपर्नेमा जोड दिएका थिए।
कार्यक्रमका प्रमुख अतिथि महेश्वर यादवले विद्यालयको पठनपाठनलाई थप गुणस्तरीय बनाउनुका साथै विद्यालयको सरसफाइ, सौन्दर्यीकरण र समग्र शैक्षिक वातावरण सुधार गर्न आवश्यक रहेको बताए। उनले विद्यालयको शैक्षिक उन्नतिका लागि शिक्षक, अभिभावक, विद्यालय व्यवस्थापन समिति तथा स्थानीय सरकारबीच सहकार्य हुनुपर्नेमा जोड दिए।
विद्यालयका प्रधानाध्यापक सिर्फ नारायण यादवले चाडपर्वको अवसरमा एकआपसमा शुभकामना आदानप्रदान गर्नुका साथै विद्यालयको शैक्षिक विकास र सुधारका विषयमा छलफल गर्दै कार्यक्रम सम्पन्न भएको जानकारी दिए।
२०३८ सालमा स्थापना भएको उक्त विद्यालयमा हाल ३८५ विद्यार्थी अध्ययनरत छन्। विद्यालयमा अधिकांश विद्यार्थी दलित समुदायका रहेको बताइएको छ। विद्यालयमा शिक्षकको स्वीकृत दरबन्दी नौ जना रहेको छ।
विद्यालयको शैक्षिक गुणस्तर सुधार, आवश्यक भौतिक पूर्वाधार निर्माण तथा विद्यार्थीलाई अनुकूल सिकाइ वातावरण उपलब्ध गराउन अभिभावक र स्थानीय सरकारको सक्रिय सहयोग आवश्यक रहेको कार्यक्रममा जोड दिइएको थियो।
