महेश सिंह, लहान सिरहा – सप्तरीको रुपनी गाउँपालिका–६ तेरहौतामा सञ्चालित पोषण लेखाजोखा अभियानअन्तर्गत समाचार तयार पार्ने क्रमसम्म ४४ जना बालबालिकाको पोषण अवस्था परीक्षण गरिएको छ। परीक्षणका क्रममा चार जना बालबालिकामा मध्यम शीघ्र कुपोषण (MAM) भेटिएको छ।
त्यस्तै, अभियानअन्तर्गत १२ जना गर्भवती महिलाको पोषण अवस्था परीक्षण गर्दा दुई जनामा मध्यम शीघ्र कुपोषण (MAM ) भेटिएको स्वास्थ्यकर्मीले जनाएका छन्। दुई जना सुत्केरी महिलाको समेत स्वास्थ्य तथा पोषण अवस्था परीक्षण गरिएकोमा उनीहरूको अवस्था सामान्य रहेको पाइएको छ।
हालसम्म परीक्षण गरिएका बालबालिकामध्ये गम्भीर शीघ्र कुपोषण (एसएएम) भने नभेटिएको वरिष्ठ अहेव नारायणप्रसाद चौधरीले जानकारी दिनुभयो। उहाँका अनुसार अन्य बालबालिकाको स्वास्थ्य अवस्था सामान्य रहेको छ।
तेरहौतामा सञ्चालित अभियानमा कार्यालय सहयोगी अर्जुनसिंह थापा, महिला स्वास्थ्य स्वयंसेविका गीता थापामगर, वरिष्ठ अहेव कमल साह र वरिष्ठ अनमी सुनिता नेपालीलगायत स्वास्थ्यकर्मी तथा स्वयंसेविकाको सहभागिता रहेको छ।
केयर नेपालको आर्थिक सहयोग तथा स्थानीय सरकारको समन्वयमा राष्ट्रिय कृषक समूह महासंघ नेपालले सिरहाका छ र सप्तरीका दुई गरी आठ स्थानीय तहमा पोषणसम्बन्धी कार्यक्रम सञ्चालन गरिरहेको महासंघकी रम्भाकुमारी साहले जानकारी दिनुभयो।
पोषण परियोजनाकी अनुगमन अधिकृत आँचल खड्काले बालबालिका तथा महिलाको पोषण अवस्था पहिचान गरी आवश्यक परामर्श, उपचार तथा स्वास्थ्य सेवाको पहुँचमा ल्याउनु अभियानको मुख्य उद्देश्य रहेको बताउनुभयो।
समयमै कुपोषण पहिचान गर्न सके त्यसबाट उत्पन्न हुनसक्ने स्वास्थ्य जोखिम न्यूनीकरण गर्न सहयोग पुग्ने उहाँले बताउनुभयो। अभियानमार्फत समुदायस्तरमै पोषण अवस्थाको परीक्षण गरी जोखिममा रहेका बालबालिका तथा महिलालाई आवश्यक स्वास्थ्य सेवासँग जोड्ने काम भइरहेको उहाँको भनाइ छ।
सोमबार अभियानको तेस्रो दिन सञ्चालन भएको पोषण लेखाजोखा कार्यक्रमको राष्ट्रिय कृषक समूह महासंघका प्रदेश सचिव यामुनप्रसाद यादव र महासंघका वित्त अधिकृत विष्णु दाहालले अनुगमन गर्नुभएको थियो। अनुगमनका क्रममा कार्यक्रमको अवस्थाबारे जानकारी लिइएको अनुजा चौधरीले बताउनुभयो।
