महेश सिंह लहान – सिरहाको लहानस्थित रामकुमार शारडा उमा प्रसाद मुरारका प्रादेशिक अस्पतालको इमर्जेन्सी (आकस्मिक) कक्ष सुधार गरी नयाँ व्यवस्थापनका साथ सञ्चालनमा ल्याइएको छ। अस्पतालले उपचारका लागि आएका एक बिरामीको हातबाट रिबन काटेर पुनर्व्यवस्थित इमर्जेन्सी कक्षको उद्घाटन गराएको हो।
लामो समयदेखि साँघुरो स्थान, अत्यधिक गर्मी, वर्षात्मा पानी चुहिने र सरसफाइको समस्या झेल्दै आएको इमर्जेन्सी कक्ष व्यवस्थित बनेपछि बिरामी तथा स्वास्थ्यकर्मीलाई सहज भएको छ।
सेवा लिन आएका कल्याणपुर नगरपालिकाका मनोजकुमार साहले यसअघि साँघुरो ठाउँ र सरसफाइको कमीले उपचार गराउन कठिनाइ हुने गरेकोमा अहिले व्यवस्थापन सुध्रिएपछि धेरै सहज भएको बताउनुभयो। त्यस्तै लहानका मङ्गैन यादवले पनि छानाबाट पानी चुहिने र सेवामा ढिलाइ हुने समस्या समाधान भएको भन्दै खुसी व्यक्त गर्नुभयो।
इमर्जेन्सी कक्षका इन्चार्ज दीपेन्द्रप्रसाद सिंहका अनुसार पहिले सिलिङ नहुँदा जस्तापाताका कारण अत्यधिक गर्मी हुने र वर्षात्मा पानी चुहिने समस्याले बिरामीको उपचारमा जटिलता थपिने गरेको थियो।
अस्पतालका मेडिकल सुपरिटेन्डेन्ट डा. वर्षा प्रकाशले बिरामीको बढ्दो चापलाई मध्यनजर गर्दै पुरानै कक्षलाई मर्मत-सम्भार गरी व्यवस्थित गरिएको जानकारी दिनुभयो। उहाँका अनुसार सुधारका क्रममा जस्तापाता फेर्ने, विद्युतीय व्यवस्थापन मिलाउने, रङ्गरोगन गर्ने, बिरामीको गोपनियताका लागि स्क्रिनिङ राख्ने तथा आवश्यक फर्निचर थप गरिएको छ।
भौतिक पूर्वाधार र सेवा व्यवस्थापनमा गरिएको यस सुधारले सर्वसाधारणलाई सहज वातावरणमा आकस्मिक स्वास्थ्य सेवा उपलब्ध गराउन सहयोग पुग्ने अस्पताल प्रशासनले जनाएको छ।
