महेश सिंह लहान- स्नातक तहमा अध्ययनका लागि भर्ना भएका नव आगन्तुक विद्यार्थीलाई स्वागत गर्न नेपाल विद्यार्थी संघ (नेविसंघ) जे.एस. मुरारका बहुमुखी क्याम्पस इकाई समितिले भव्य समारोहको आयोजना गरेको छ।
कार्यक्रम इकाई समितिका सभापति पना लाल दासको अध्यक्षता मा सम्पन्न भएको थियो भने प्रमुख अतिथिका रूपमा लहान नगर प्रमुख महेश प्रसाद चौधरी उपस्थित थिए। नगर प्रमुख चौधरीले विद्यार्थीहरूको हकहितका लागि नेविसंघको योगदानको प्रशंसा गर्दै अध्ययनका लागि सहज वातावरण सिर्जना गर्न नगरपालिका सधैं प्रतिबद्ध रहेको बताए। साथै, क्याम्पसमा अधुरो रहेको स्ववियु भवनलाई चाँडै निर्माण सम्पन्न गर्ने आश्वासन दिए।
कार्यक्रममा नेपाल विद्यार्थी संघका जिल्ला सभापति पपु यादव, क्याम्पस सभापति रामकृष्ण यादव, नेता मनिष चौधरी लगायतका विद्यार्थी नेताहरूले नव आगन्तुक विद्यार्थीहरूलाई खादा र अबिर टिका लगाएर स्वागत गरे। उनीहरूले विद्यार्थीहरूको अधिकारको पक्षमा नेविसंघ सधैं क्रियाशील रहने बताए।
स्वागत समारोहमा क्याम्पस प्रशासनको पनि उल्लेखनीय सहभागिता रहेको थियो। कार्यक्रममा क्याम्पस प्रमुख संजय कुमार चौधरी, सहायक क्याम्पस प्रमुख सजन साह, कन्हैया भट्ट, सुमन साह लगायत प्राध्यापक तथा क्याम्पसमा अध्ययनरत विद्यार्थीहरूको उल्लेखनीय उपस्थिति रहेको थियो।
क्याम्पस प्रशासनले फागुन १५, १६ र १७ गते छात्रवृत्तिसम्बन्धी अन्तर्वार्ता सञ्चालन गरिने जानकारी गराएको छ। यस छात्रवृत्ति कार्यक्रमले आर्थिक रूपमा कमजोर तथा मेधावी विद्यार्थीहरूलाई राहत पुग्ने क्याम्पस प्रशासनको विश्वास छ।
कार्यक्रमलाई झन् उत्साहजनक बनाउन विभिन्न सांस्कृतिक कार्यक्रमहरू समेत प्रस्तुत गरिएको थियो। कार्यक्रममा मिथिलाका चर्चित गायक सरोज सन्त ले आफ्नो विशेष प्रस्तुति दिएका थिए। विद्यार्थीहरूले मिथिला संस्कृतिसँग सम्बन्धित गीत–संगीत प्रस्तुत गरेर कार्यक्रमलाई झनै मनोरञ्जनात्मक बनाएका थिए।
कार्यक्रमको समापन गर्दै आयोजकहरूले नव आगन्तुक विद्यार्थीहरूलाई क्याम्पसको पठनपाठन, अनुशासन तथा सुविधाबारे जानकारी गराएका थिए। क्याम्पसलाई शैक्षिक तथा भौतिक रूपमा अझ मजबुत बनाउने प्रतिबद्धता व्यक्त गर्दै विद्यार्थी संघका नेताहरूले एकताबद्ध भएर अगाडि बढ्न सबैलाई आह्वान गरे।
