महेश सिंह सिरहा – सिरहाको भगवानपुर गाउँपालिका–१ मा अवस्थित ऐतिहासिक तथा धार्मिक आस्था जोडिएको श्री बाला सुन्दरी भगवती मन्दिर परिसरलाई आइतबार सरसफाइ गरिएको छ।
लक्ष्मी नारायण कौज माध्यमिक विद्यालय (ल.ना. कौज मा.वि.) का पूर्वविद्यार्थी मञ्चको सक्रिय पहलमा गरिएको उक्त सरसफाइ कार्यक्रममा स्थानीय बुद्धिजीवी, समाजसेवी, विद्यार्थी तथा मन्दिरमा दैनिक पुजाआजा गर्ने भक्तजनहरूको उल्लेखनीय सहभागिता रहेको थियो।
आयोजक मञ्चका प्रतिनिधिहरूका अनुसार मन्दिर क्षेत्रलाई सभ्य, स्वच्छ र आकर्षक बनाउने उद्देश्यले सरसफाइ कार्यक्रम आयोजना गरिएको हो। कार्यक्रमको क्रममा मन्दिर परिसरका भित्ताभित्र र वरपर थुप्रिएका फोहोर–फोहराहरु संकलन गरी व्यवस्थापन गरिएको थियो।
समाजमा स्वच्छता र धार्मिक स्थल संरक्षणबारे चेतना जगाउने उद्देश्य पनि यस अभियानमार्फत गरिएको सहभागीहरूको भनाइ छ। कार्यक्रममा स्थानीय बासिन्दाले यस्तो सरसफाइ अभियानलाई निरन्तरता दिनुपर्ने सुझावसमेत दिएका छन्।
पूर्वविद्यार्थी मञ्चले कार्यक्रममा उपस्थित भई सहयोग गर्ने सम्पूर्ण दाजुभाइ–दिदीबहिनी, स्थानीय समाजसेवी तथा बुद्धिजीवीहरूप्रति हार्दिक आभार प्रकट गरेको छ। मञ्चले आगामी दिनमा पनि समाजिक र शैक्षिक क्षेत्रमा योगदानमूलक कार्यक्रम गर्दै जाने प्रतिबद्धता जनाएको छ।
