नेपालमा ७१% मानिस नसर्ने रोगबाट प्रभावित, लहानमा निःशुल्क उपचार सेवा सुरू

महेश सिंह लहान, सिरहा- मधेस प्रदेशमा नसर्ने रोगका बिरामीका लागि सहज र गुणस्तरीय उपचार सेवा उपलब्ध गराउने उद्देश्यले लहानमा पेन-प्लस (PEN-Plus) क्लिनिक सञ्चालनमा आएको छ। लहान नगरपालिका, अस्पताल विकास समिति तथा स्वास्थ्य तथा जनसंख्या मन्त्रालयको सहकार्यमा स्थापना भएको यो क्लिनिकले मुटु, मधुमेह, श्वासप्रश्वास, थालासेमिया, सिकलसेल, छारे रोग र अटिजम जस्ता गम्भीर नसर्ने रोगहरूको निःशुल्क उपचार सेवा प्रदान गर्नेछ।
क्लिनिकको उद्घाटन लहान नगरपालिकाका प्रमुख महेश प्रसाद चौधरीले गरेका छन्। कार्यक्रममा अस्पताल विकास समितिका अध्यक्ष शत्रुधलन मण्डल, वरिष्ठ मुटुरोग विशेषज्ञ डा. भगवान कोइराला, अस्पतालका मेसु डा. बृजेन्द्र साह, डा. कुसुम यादव लगायतको उपस्थिति रहेको थियो।
नेपालमा ७१ प्रतिशतभन्दा बढी मानिस नसर्ने रोगबाट प्रभावित रहेको तथ्यांकले देखाएको छ। मधेस प्रदेशमा यसको प्रभाव अझै बढी देखिएकाले, स्वास्थ्य सेवा पहुँचलाई सुधार्न यो क्लिनिक प्रभावकारी बन्ने अपेक्षा गरिएको छ।
वरिष्ठ चिकित्सक डा. भगवान कोइरालाको विशेष निगरानीमा सञ्चालन हुने यस क्लिनिकबाट गम्भीर नसर्ने रोग भएका बिरामीले अब उपचारका लागि काठमाडौं वा अन्यत्र जानुपर्ने बाध्यता कम हुने विश्वास गरिएको छ।
गम्भीर नसर्ने रोगका बिरामीका लागि ओपीडी सेवा
निःशुल्क इको (ECHO) तथा एचपीएलसी (HPLC) परीक्षण सेवा
थालासेमिया बिरामीलाई निःशुल्क औषधि, बेड चार्ज तथा रक्तसञ्चार सेवा
स्वास्थ्य बीमामा आबद्ध गराउँदै बीमा सक्रिय नहुँदासम्म निःशुल्क औषधि र ल्याब परीक्षण सेवा
अस्पतालका मेसु डा. बृजेन्द्र साहका अनुसार, “नसर्ने रोग नियन्त्रण गर्न समुदायस्तरमा स्क्रिनिङ अभियान सञ्चालन गरिनेछ। विशेष गरी, १९ वर्षमुनिका किशोरीहरूको पाठेघरको क्यान्सर पहिचान गर्न प्रत्येक पालिकामा स्क्रिनिङ कार्यक्रम थालिनेछ।”
नगर प्रमुख चौधरीले भने, “यो क्लिनिक तीन जिल्लाका गरिब, दलित तथा विपन्न समुदायका बिरामीहरूको लागि स्वास्थ्य सेवा केन्द्र बन्नेछ। नसर्ने रोगका कारण उत्पन्न स्वास्थ्य समस्यालाई व्यवस्थित गर्न यसले ठोस योगदान दिनेछ।”
स्वास्थ्य तथा जनसंख्या मन्त्रालयको नेतृत्वमा, युनिसेफ (UNICEF) तथा काठमाडौं इन्स्टिच्युट अफ चाइल्ड हेल्थ (KIOCH) को साझेदारीमा सञ्चालित यो क्लिनिकले मधेस प्रदेशका बिरामीलाई सहज, गुणस्तरीय र निःशुल्क स्वास्थ्य सेवा प्रदान गर्ने लक्ष्य राखेको छ।
यो क्लिनिक सञ्चालनमा आएपछि नसर्ने रोगका बिरामीलाई उपचारका लागि बाहिर जानुपर्ने समस्या कम हुने आशा गरिएको छ।