महेश सिंह लहान सिरहा- जनता समाजवादी पार्टी (जसपा) नेपालले मधेश प्रदेशका संगठनहरूलाई सुदृढ बनाउन लक्षित तीन दिने प्रदेशस्तरीय प्रशिक्षण कार्यक्रम आज जनकपुरधाममा सुरू गरेको छ। पार्टी स्कुल तथा प्रशिक्षण विभागद्वारा आयोजित उद्घाटन सत्रमा मधेशका विभिन्न जिल्लाबाट नेता तथा कार्यकर्ताको उल्लेखनीय उपस्थिति देखियो।
उद्घाटनसत्रपछि पहिलो दिनको मुख्य कक्षा पार्टी अध्यक्ष तथा प्रमुख प्रशिक्षक उपेन्द्र यादवले सञ्चालन गरे। उनले “नेपालको राजनीतिक शक्तिहरूको तुलनात्मक अध्ययन” शीर्षकमा दलहरूको वैचारिक आधार, वर्तमान राजनीतिक अवस्था, शक्ति–सन्तुलन, संघीय–प्रदेशीय सम्बन्ध र बदलिँदो राजनीतिक समीकरणबारे विस्तृत विश्लेषण प्रस्तुत गरे।
यादवले अध्ययनका आधारमा नीति–निर्माण र संगठन सुदृढीकरण गर्न सकिने भन्दै, अध्ययनशील नेतृत्व निर्माण नै पार्टीलाई अगाडि बढाउने मुख्य आधार रहेको स्पष्ट पारे।
पार्टी स्कुल तथा प्रशिक्षण विभागका अध्यक्ष सुरेश मण्डलले प्रशिक्षणले मधेशभरका संगठनात्मक संरचनालाई व्यवस्थित बनाउँदै नेता–कार्यकर्तालाई स्पष्ट नीति–दिशा प्रदान गर्ने उद्देश्य रहेको जानकारी दिए।
कार्यक्रममा पार्टीका केन्द्रीय सचिव सुरेश मण्डलसहित प्रशिक्षक टोलीले वैचारिक मार्गदर्शन, संगठन व्यवस्थापन, संवाद–कौशल तथा बदलिँदो राजनीतिक परिस्थितिमा जसपाको भूमिकामाथि प्रशिक्षण दिएका थिए।
मधेश प्रदेशस्तरीय यस प्रशिक्षणलाई जसपाले दीर्घकालीन संगठन सुदृढीकरण, अध्ययन–आधारित नेतृत्व विकास र नीति–दिशा एकीकरणको महत्वपूर्ण कदमका रूपमा लिएको बताइएको छ।
