महेश सिंह लहान सिरहा-अपाङ्गता भएका व्यक्तिहरूको हक–अधिकार, पहुँच र सामाजिक समावेशीतालाई सुदृढ बनाउने उद्देश्यसहित अपाङ्गता अधिकार मञ्च नेपालद्वारा आयोजित औपचारिक उद्घाटन कार्यक्रम शुक्रबार सिरहाको गोलबजारमा सम्पन्न भएको छ।
मंसिर १२ गते भएको उद्घाटन समारोह मञ्चका अध्यक्ष उमेश बरालको अध्यक्षता तथा CDWN Nepal का डाइरेक्टर तेजेन्द्र लामा कुमारको प्रमुख आतिथ्यमा सम्पन्न भयो। कार्यक्रममा गोलबजार तथा आसपासका क्षेत्रका विभिन्न संघ–संस्थाका प्रतिनिधि, सुरक्षा निकायका अधिकारी, पत्रकार, बुद्धिजीवी, सामाजिक व्यक्तित्वलगायतको उल्लेख्य उपस्थिति देखिएको थियो।
उद्घाटन सत्रमा बोल्दै अतिथि वक्ताहरूले अपाङ्गता सम्बन्धी अधिकार सुनिश्चितता, उपयुक्त नीति–कार्यन्वयन, सेवा–सुविधामा पहुँच विस्तार र स्थानीय तहमा व्यवहारिक सुधारका विषयलाई प्राथमिकतामा राख्नुपर्नेमा जोड दिए।
उपस्थित सहभागीले अपाङ्गता भएका व्यक्तिहरूलाई आत्मनिर्भर बनाउने कार्यक्रम, सीप विकास, परामर्श तथा अधिकार केन्द्रित अभियानलाई अझ प्रभावकारी बनाउन संस्थालाई सुझाव पनि दिएका थिए।
कार्यक्रम सफलतापूर्वक सम्पन्न भएपछि आयोजकले उपस्थित सबैप्रति आभार व्यक्त गर्दै आगामी दिनमा अधिकार–अभियानलाई संस्थागत र सशक्त रूपमा अघि बढाइने प्रतिबद्धता जनाएको छ।
