महेश सिंह, लहान (सिरहा)।आगामी फाल्गुण २१ गते हुने प्रतिनिधि सभा निर्वाचनका लागि सिरहा निर्वाचन क्षेत्र नम्बर–१ बाट स्वतन्त्र उम्मेदवारका रूपमा सन्तोष गिरी सिलवाल चुनावी मैदानमा उत्रिएका छन्। स्वर्गीय सामाजिक चिन्तक तथा बौद्धिक नेता प्रदीप गिरीका एक्ला छोरा गिरीले विचार र सिद्धान्त केन्द्रित राजनीतिलाई प्राथमिकतामा राख्दै उम्मेदवारी दिएका हुन्।
राजनीतिक पृष्ठभूमि र वैचारिक वातावरणमा हुर्किएका गिरीले परम्परागत शक्ति–केन्द्रित राजनीतिभन्दा फरक ढंगले जनतामाझ प्रस्तुत भइरहेका छन्। उनले आफू पद, प्रतिष्ठा वा सत्ताको लागि नभई राजनीतिक संस्कारको पुनःस्थापना र वैचारिक स्पष्टताको अभ्यासका लागि उम्मेदवारी दिएको स्पष्ट पारेका छन्।
हाल उनी घरदैलो कार्यक्रममार्फत गाउँ–गाउँ पुगेर मतदातासँग प्रत्यक्ष संवादमा व्यस्त छन्। स्थानीय नागरिकका समस्या, सुझाव र अपेक्षा सुन्दै उनी शिक्षा, स्वास्थ्य, रोजगारी, कृषि सुधार र सुशासनलाई आफ्नो मुख्य एजेन्डाका रूपमा अघि सारेका छन्।
स्थानीय स्तरमा गिरीप्रति सकारात्मक चासो देखिएको बताइन्छ। विशेषगरी युवापुस्तामाझ उनको उम्मेदवारीले उत्साह थपेको समर्थकहरूको दाबी छ। विचारमा आधारित राजनीति आवश्यक रहेको उल्लेख गर्दै उनका समर्थकहरूले गिरीलाई सक्षम, इमानदार र दूरदर्शी उम्मेदवारका रूपमा चित्रण गरिरहेका छन्।
स्वतन्त्र उम्मेदवारका रूपमा प्रतिस्पर्धामा उत्रिएका गिरीले दलगत सीमाभन्दा माथि उठेर समग्र क्षेत्रको विकास, पारदर्शिता र उत्तरदायित्वपूर्ण राजनीतिक अभ्यासलाई प्राथमिकता दिने प्रतिबद्धता जनाएका छन्। निर्वाचन मिति नजिकिँदै जाँदा सिरहा–१ मा उनको सक्रियता र चुनावी माहोल थप चासोको विषय बन्दै गएको छ।
