३५औँ वार्षिकोत्सवमा ओरेकको सन्देश—समानता र न्यायका लागि निरन्तर संघर्ष
महेश सिंह लहान सिरहा – महिला अधिकार र सामाजिक न्यायको क्षेत्रमा क्रियाशील संस्था ओरेकले आफ्नो ३५औँ वार्षिकोत्सव मधेस प्रदेश कार्यालयको प्राङ्गणमा विभिन्न कार्यक्रमसहित मनाएको छ।
वार्षिकोत्सवका अवसरमा संस्थाले विगतदेखि सञ्चालन गर्दै आएका अभियान तथा कार्यक्रमहरूलाई आर्ट चित्र प्रदर्शनीमार्फत प्रस्तुत गरेको थियो भने भिडियो प्रस्तुति मार्फत गतिविधिहरूको झलक देखाइएको थियो। कार्यक्रममा दीप प्रज्वलन गरी औपचारिक रूपमा दिवस मनाइएको आयोजकले जनाएको छ।
कार्यक्रम मधेस प्रदेश सभाका सांसद तथा महिला, बालबालिका तथा सामाजिक न्याय समितिकी प्रमुख माननीय रूपा यादवको प्रमुख आतिथ्यमा सम्पन्न भएको हो। कार्यक्रममा प्रदेश सांसदहरू जिबछी यादव र रमिता प्रधान, राष्ट्रिय मानव अधिकार आयोग मधेस प्रदेशका प्रमुख बुद्धनारायण सहनीसहित आयोगको टोली, जिल्ला समन्वय समिति धनुषाका प्रमुख राजनन्दर मण्डल, उपप्रमुख संगीता ठाकुर तथा जनकपुरधाम उपमहानगरपालिकाका उपप्रमुख किशोरी शाह लगायतको उपस्थिति रहेको थियो।
त्यसैगरी महिला मानवअधिकार रक्षक सञ्जालका राष्ट्रिय अध्यक्ष श्यामकुमारी शाह, प्रदेश अध्यक्ष रेखा झा, धनुषा र महोत्तरीका महिला मानवअधिकार रक्षकहरूको टोली, जिल्ला प्रहरी कार्यालयका प्रतिनिधिहरू, विभिन्न सरकारी तथा गैरसरकारी संघसंस्थाका प्रतिनिधि, महिला, युवा तथा किशोरी समूहका सदस्यहरू तथा पत्रकारसहित करिब ८२ जनाको सहभागिता रहेको आयोजकले जनाएको छ।
कार्यक्रमका क्रममा सहभागी अतिथिहरूबाट शुभकामना तथा सुझावहरू संकलन गरिएको थियो। वक्ताहरूले महिला अधिकार, लैंगिक समानता र सामाजिक न्यायका मुद्दामा ओरेकले खेलेको भूमिकाको प्रशंसा गर्दै आगामी दिनमा पनि अभियानलाई सशक्त रूपमा अघि बढाउन आग्रह गरेका थिए।
ओरेक नेपालका मधेस प्रदेश संयोजक बिना सिंहका अनुसार संस्थाले महिलावादी दृष्टिकोणबाट समाज रूपान्तरण गर्ने लक्ष्यसहित विभिन्न अभियानहरू सञ्चालन गर्दै आएको छ। उनले उक्त अभियानमा साथ, सहयोग र एक्यबद्धता जनाउने सबैप्रति आभार व्यक्त गरिन्।
