महेश सिंह महोत्तरी – नेपाली समाजमा दिनप्रतिदिन बढ्दै गएको अशान्ति, हिंसा तथा सामाजिक द्वन्द्वलाई संवादको माध्यमबाट समाधान गर्ने उद्देश्यले बर्दिबासमा पाँच दिने प्रदेशस्तरीय संवाद तालिम सुरु भएको छ।
समग्र जन उत्थान केन्द्र, लहान को आयोजनामा जेठ २७ गतेदेखि सुरु भएको उक्त तालिममा मधेश प्रदेशका विभिन्न जिल्लाबाट आएका करिब २७ जना सहभागी रहेको जानकारी संस्थाकी प्रतिनिधि सुनिता चौधरी ले दिएकी छन्।
तालिमका सहजकर्ता गोपाल चौधरी का अनुसार नेपाली समाजमा बढ्दो अशान्ति, हिंसा र सामाजिक तनावलाई संवादको माध्यमबाट समाधान गर्न सकिन्छ भन्ने मान्यताका साथ ‘शान्तिका लागि संवाद’ कार्यक्रम सञ्चालन गरिएको हो। उनले समाजमा आपसी विश्वास, सहिष्णुता र सद्भाव कायम गर्न संवाद संस्कृतिको विकास आवश्यक रहेको बताए।
पाँच दिनसम्म सञ्चालन हुने तालिममा सहभागीहरूलाई प्रभावकारी संवाद, द्वन्द्व व्यवस्थापन, शान्ति निर्माण, नेतृत्व विकास तथा सामाजिक सद्भाव प्रवर्द्धनसम्बन्धी विषयमा प्रशिक्षण प्रदान गरिनेछ। तालिमबाट प्राप्त ज्ञान र सीपलाई समुदायस्तरमा प्रयोग गरी शान्तिपूर्ण र समावेशी समाज निर्माणमा योगदान पुग्ने अपेक्षा गरिएको छ।
कार्यक्रमलाई जर्मन सहयोग, GIZ तथा ZFD Civil Peace Service को सहयोग रहेको छ। आयोजक संस्थाले यस्ता कार्यक्रमले समाजमा बढ्दो असहिष्णुता र द्वन्द्व न्यूनीकरण गर्दै दिगो शान्ति स्थापनामा महत्वपूर्ण भूमिका खेल्ने विश्वास व्यक्त गरेको छ।
