महेश सिंह, लहान सिरहा -सिरहाका दुई विद्यालयमा जलवायु परिवर्तन, वातावरण संरक्षण तथा वातावरणमैत्री व्यवहारसम्बन्धी अभिमुखीकरण कार्यक्रम सम्पन्न भएको छ ।
सखुवानान्कारकट्टी गाउँपालिका–१ मौवाहीस्थित श्री जनता नमुना माध्यमिक विद्यालय, प्राविधिक धार र भगवानपुर गाउँपालिका–२ स्थित लक्ष्मीनारायण कौशल्या माध्यमिक विद्यालयमा उक्त कार्यक्रम सञ्चालन गरिएको हो ।
जलवायु मैत्री गाउँ मधेस प्रदेश परियोजना नेपालअन्तर्गत आयोजित कार्यक्रममा विद्यार्थीलाई जलवायु परिवर्तनका असर, वातावरण संरक्षण, फोहोरमैला व्यवस्थापन, वृक्षरोपण, प्लास्टिकजन्य वस्तुको प्रयोग न्यूनीकरण तथा वातावरणमैत्री व्यवहारका विषयमा जानकारी गराइएको थियो ।
कार्यक्रमअन्तर्गत लक्ष्मीनारायण कौशल्या माध्यमिक विद्यालयमा इको क्लब गठन गरिएको छ । विद्यालयमा इको क्लब गठन भएपछि वातावरण संरक्षणसँगै विद्यालयको सौन्दर्यीकरणमा समेत सहयोग पुग्ने प्रधानाध्यापक कविता ठाकुरले बताउनुभयो ।
मौवाहीस्थित श्री जनता नमुना माध्यमिक विद्यालयमा निमित्त प्रधानाध्यापक पवनकुमार यादवको रोहबरमा निर्वाचन प्रक्रियाबाट प्रनिती चौधरीको अध्यक्षतामा २१ सदस्यीय इको क्लब गठन गरिएको छ ।
कार्यक्रममा सखुवानान्कारकट्टी गाउँपालिका–१ का वडाध्यक्ष सञ्जयकुमार यादव, विद्यालयका अंग्रेजी शिक्षक रामबालक यादव, फोकल शिक्षक, शिक्षक तथा विद्यार्थीको सहभागिता रहेको थियो ।
कार्यक्रममा सहभागी वक्ताले जलवायु परिवर्तनको असर न्यूनीकरणका लागि विद्यालय तहदेखि नै वातावरणीय सचेतना अभिवृद्धि गर्नुपर्नेमा जोड दिनुभयो । विद्यार्थीलाई वातावरण संरक्षणका गतिविधिमा सहभागी गराउँदा त्यसको सकारात्मक प्रभाव परिवार हुँदै समुदायसम्म पुग्ने उहाँहरूको भनाइ थियो ।
कार्यक्रमको सहजीकरण पिंकीकुमारी शर्मा र विभाकुमारी यादवले गर्नुभएको थियो । केयर नेपालको आर्थिक सहयोगमा राष्ट्रिय कृषक समूह महासंघ नेपालले आयोजना गरेको कार्यक्रम स्थानीय सरकारको समन्वय तथा विद्यालयको सहकार्यमा सञ्चालन गरिएको आयोजक संस्थाकी प्रतिनिधि रचना श्रेष्ठले जानकारी दिनुभयो ।
त्यस्तै, एनवाईसीए जनकपुरधामको प्राविधिक सहकार्यमा प्रशिक्षण सञ्चालन गरिएको थियो । प्रशिक्षणले विद्यार्थीलाई जलवायु परिवर्तनका असर न्यूनीकरण गर्न सकिने विषयमा सचेत र प्रेरित बनाएको परियोजनाका फिल्ड सुपरभाइजर उमेश नन्दन चौधरीले बताउनुभयो ।
इको क्लबमार्फत विद्यालयमा वातावरण संरक्षण, हरियाली प्रवर्द्धन, फोहोरमैला व्यवस्थापन तथा जलवायु अनुकूलनसम्बन्धी गतिविधिलाई निरन्तरता दिइने आयोजकले जनाएको छ ।
