महेश सिंह लहान, सिराहा – लहान नगरपालिकाको वडा नम्बर ७ मा निर्माणाधीन दुर्गा मन्दिरको काम तीव्र गतिमा अघि बढिरहेको छ। करिब ४ करोड ७० लाख रुपैयाँ लागतमा निर्माण भइरहेको उक्त मन्दिरलाई गुणस्तरीय बनाउन नगरपालिकाले विशेष निगरानी गरिरहेको छ। नगर उपप्रमुख राम चलितर महतोका अनुसार, निर्माणकार्यमा कुनै पनि त्रुटि नहोस् भनेर २४ घण्टा प्राविधिक टोली परिचालित गरिएको छ।
हालसम्म मन्दिर निर्माण कार्यको पहिलो तलासम्मको संरचना तयार भइसकेको छ। नगरपालिकाका प्राविधिक कर्मचारी अभर सियर श्याम साह नेतृत्वको टोलीले निरन्तर अनुगमन गरिरहेको छ। “ढलानको काम सुरु हुन लागेको छ, यसलाई मजबुत बनाउन गुणस्तर कायम गरिन्छ,” साहले बताए।
लहान नगरपालिकाले निर्माण कार्यको हरेक चरणमा गुणस्तर कायम राख्न कडाइ गरेको छ। “हाम्रो प्राथमिकता मन्दिरको मजबुत संरचना निर्माण गर्नु हो। ढिलाइ नभई गुणस्तरीय काम गर्न नगरपालिकाले निगरानी बढाएको छ,” नगर उपप्रमुख महतोले भने।
ठेक्का सम्झौताअनुसार, मन्दिर निर्माण २०८० साल चैत ५ गतेबाट सुरु भएको हो र २०८२ असोज २ भित्र सम्पन्न गरिने लक्ष्य छ। ठेक्का पाएको उत्तरा कन्स्ट्रक्सन एण्ड सप्लायर्स प्रा. लि. ले कामलाई निर्धारित समयमै सम्पन्न गर्न सम्पूर्ण स्रोत साधन परिचालन गरिरहेको छ।
दुर्गा मन्दिर हिन्दू धर्मावलम्बीहरूको आस्थाको केन्द्रका रूपमा रहेको छ। स्थानीयवासीहरू पनि निर्माण प्रक्रियामा चासो राख्दै आएका छन्। “हाम्रो समुदायको आस्थासँग जोडिएको यो मन्दिर मजबुत र सुन्दर बन्नुपर्छ। नगरपालिकाले अनुगमन गरिरहेको देख्दा ढुक्क छौं,” स्थानीय रामनारायण यादवले भने।
नगरपालिकाले मन्दिर निर्माणमा कुनै पनि कमजोरी हुन नदिने प्रतिबद्धता जनाएको छ। गुणस्तर कायम गर्दै समयमा काम सम्पन्न गराउने योजनामा लहान नगरपालिका दृढ रहेको छ।
