महेश सिंह लहान, सिरहा- लहान नगरपालिकाको वडा नं. ९ मा नयाँ वडा भवन निर्माण कार्य सुरु भएको छ। स्थानीय तहलाई व्यवस्थित र प्रभावकारी बनाउन नगरपालिकाले अघि बढाएको यो योजनाको भूमिपूजन तथा शिलान्यास बुधबार सम्पन्न भएको हो।
नगर प्रमुख महेश प्रसाद चौधरी र वडा अध्यक्ष घुरन चौधरीले हिन्दू परम्पराअनुसार विधिपूर्वक पूजा गर्दै भवन निर्माणको थालनी गरेका हुन्। कार्यक्रमलाई सम्बोधन गर्दै नगर प्रमुख चौधरीले “स्थानीय प्रशासनलाई बलियो बनाउने र नागरिकलाई सहज सेवा प्रदान गर्ने” लक्ष्यका साथ भवन निर्माण थालिएको बताए।
निर्माण कम्पनी श्री बिसमिल्लाह कन्ट्रक्सन, बीरगंज महानगरपालिका-३१, पर्साले रु. ३५ लाख ३२ हजार ६९१ लागतमा निर्माण जिम्मा लिएको छ। सम्झौताअनुसार २०७९ मंसीर ६ गते निर्माण कार्यको सम्झौता भएको थियो भने २०८२ जेठ ३१ गते सम्म सम्पन्न गर्ने लक्ष्य राखिएको छ।
वडा अध्यक्ष घुरन चौधरीका अनुसार “नयाँ भवन बनेपछि स्थानीयबासीलाई वडा कार्यालयका सेवा लिन सहज हुनेछ”। उनका अनुसार हालको अस्थायी कार्यालयबाट सेवा प्रवाह गर्दा विभिन्न कठिनाइ हुँदै आएको थियो, जसलाई नयाँ भवनले समाधान गर्नेछ।
भूमिपूजन कार्यक्रममा स्थानीय जनप्रतिनिधि, समाजसेवी तथा नगरपालिकाका अधिकारीहरूको उपस्थिति थियो। कार्यक्रममा बोल्दै नगर प्रमुख चौधरीले “नगरपालिकाले थप पूर्वाधार विकासका योजनाहरू अघि बढाइरहेको” जानकारी दिए।
स्थानीय बासिन्दा समेत उत्साहित देखिएका छन्। उनीहरूका अनुसार व्यवस्थित भवनले सेवा प्रवाह सहज हुनुका साथै प्रशासनिक काम छिटोछरितो हुनेछ।अब नगरपालिकाले भवन निर्माणलाई तीव्रता दिने बताइएको छ।
