महेश सिंह सिरहा –गोलबजार–५ धर्मपुरमा मागी विवाह भएर पुगेकी कोशीला मुखिया अहिले माईतीघर सिरहाको धनगढीमाई नगरपालिका–३ कुरवामा जीवन धानिरहेकी छन्। करिब २० वर्षअघि ससुराली गएकी ३७ वर्षीया कोशीला सडक विस्तारसँगै उजाडिएको घर–जग्गा गुमाएपछि पाँच छोराछोरीसहित फेरि माईती फर्किन बाध्य भइन्।
श्रीमान् दिलीप मुखिया मानसिक रोगी छन्। घर चलाउने क्षमता गुमाएका श्रीमान्सँगै कोशीला वर्षौं विपन्नतामा गुज्रिइन्। सानो जग्गा पनि सडकले लिँदा उनी पूर्ण रूपमा सुकुम्बासी बनिन्। अब उनीसँग न आफ्नो घर छ, न जमिन। छोराछोरीको भविष्यको चिन्ताले उनी दिनरात पिरोलिन्छिन्।
चार वर्षदेखि कुरवामै जीवन धानिरहेकी उनी श्रम बेचेर बालबच्चा हुर्काइरहेकी छन्। ‘बिहे गर्दा लागेको थिएन कि फेरि माईतीमै आउनुपर्ला,’ कोशीलाले भनिन्, ‘तर, जीवन यस्तो मोडमा आइपुग्यो।’
उनको दुःख देखेर कतारस्थित डब्लुएफसी कम्पनीमा काम गरिरहेका पवन कुमार मुखिया भावुक बने। उनले विदेशबाट ३० हजार रुपैयाँ सहयोग पठाए। सहयोग रकम उनकी श्रीमती मञ्जु मुखियामार्फत कोशीलासम्म पुगेको हो।
शनिबार नगरप्रमुख शिवशंकर महतो, पूर्व वडाध्यक्ष देवन साहलगायतको उपस्थितिमा कोशीलालाई रकम हस्तान्तरण गरियो। सहयोग हस्तान्तरण गर्दै नगरप्रमुख महतोले उनलाई घर बनाइदिने र छोराछोरीको पढाइमा नगरपालिकाले साथ दिने आश्वासन दिए।
‘उहाँजस्तो विपन्न परिवारलाई सहयोग गर्नु हाम्रो दायित्व हो,’ महतोले भने, ‘नगरपालिकाबाट यथासम्भव सहयोग गरिनेछ।’
सामाजिक उत्तरदायित्व बोध गर्दै वैदेशिक रोजगारीबाटै सहयोग गर्ने युवाको यो कदमलाई स्थानीयले प्रशंसा गरेका छन्। ‘साह्रै सराहनीय काम हो,’ स्थानीय बासिन्दा शिवनारायण मुखियाले भने, ‘यस्ता सहयोगले समाजमा आशाको उज्यालो दिन्छ।’
