महेश सिंह लहान सिरहा –सिरहाको लहान नगरपालिका–३ स्थित पासवान टोलमा जाडोबाट प्रभावित गरिब तथा विपन्न समुदायलाई लक्षित गर्दै फाइबर सिरक वितरण कार्यक्रम सम्पन्न भएको छ।
लायन्स क्लब अफ लहान फुलबारीको आयोजनामा तथा लायन्स इन्टरनेशनल डिष्ट्रिक्ट ३२५ एफ, नेपालको सहयोगमा सम्पन्न उक्त कार्यक्रममा डिष्ट्रिक्ट गभर्नर लायन केशर बहादुर भण्डारीसहित विभिन्न लायन्स क्लबका पदाधिकारीहरूको सहभागिता रहेको थियो।
कार्यक्रममा लायन्स क्लब अफ फुलबारीका संस्थापक तथा वरिष्ठ समाजसेवी राकेश झा, पूर्व अध्यक्षहरू शंकरप्रसाद गुप्ता, श्यामसुन्दर साह, चक्रपानी दाहाललगायत मनकारी व्यक्तिहरूको समूहले जाडोको मारमा परेका परिवारलाई फाइबर सिरक वितरण गरेका हुन्।
चिसो बढ्दै जाँदा दैनिक जीवन प्रभावित बनेका स्थानीय बासिन्दालाई राहत दिने उद्देश्यले गरिएको उक्त सहयोगले समुदायमा सकारात्मक सन्देश दिएको सहभागीहरूले बताएका छन्। स्थानीयवासीहरूले यस्ता मानवीय कार्यक्रमले कठिन समयमा सहारा प्रदान गर्ने भन्दै आयोजकप्रति आभार व्यक्त गरेका छन्।
आयोजक संस्थाका अनुसार सामाजिक सेवा, राहत तथा मानवीय सहयोगलाई प्राथमिकतामा राख्दै आगामी दिनमा पनि यस्ता कार्यक्रमलाई निरन्तरता दिइनेछ।
