महेश सिंह लहान सिरहा-सप्तरी जिल्लाको सुरुङ्गा नगरपालिकामा महालक्ष्मी कपडा बैंक औपचारिक रूपमा सञ्चालनमा आएको छ। सुरुङ्गा नगरपालिकाकी नगर प्रमुख गिता चौधरीले पानसमा बत्ती बालेर कपडा बैंकको सामुद्घाटन गर्नुभएको हो। समाजसेवी डिकुरा पोखरेललगायत दर्जनौँ अतिथिहरूको उपस्थितिमा उद्घाटन कार्यक्रम सम्पन्न भएको सहकारीका म्यानेजर सन्जु काफ्ले पोखरेलले जानकारी दिनुभयो।
कार्यक्रम सामाजिक सहकार्य र मानवीय सेवाको सन्देशसहित सम्पन्न भएको उहाँले बताउनुभयो।
उद्घाटन समारोहलाई सम्बोधन गर्दै समाजसेवी तथा सहकारीका म्यानेजर सन्जु काफ्ले पोखरेलले “सबैले बाँच्न पाउन, सबैले लगाउन पाउन, हुनेले दिने र नहुनेले लिने” भन्ने मूल नारासहित कपडा बैंकलाई दीर्घकालीन रूपमा सञ्चालन गर्ने प्रतिबद्धता व्यक्त गर्नुभयो।
उहाँले अभियान सफल बनाउन स्थानीय तह, समुदाय तथा सर्वसाधारण सबैको साथ–सहयोग र सक्रिय सहभागिताको अपेक्षा गर्नुभयो। नगर प्रमुख गिता चौधरीले महालक्ष्मी सहकारीद्वारा सञ्चालन गरिएको कपडा बैंकलाई सप्तरी जिल्लामै मात्र नभई मधेस प्रदेशकै उदाहरणीय तथा सम्भवतः पहिलो किसिमको सामाजिक कार्यको रूपमा उल्लेख गर्दै उच्च प्रशंसा गर्नुभयो। उहाँले यस्ता मानवीय तथा सामाजिक उत्तरदायित्वका कार्यक्रमले समाजमा सकारात्मक परिवर्तन ल्याउने र कमजोर वर्गको जीवनस्तर सुधारमा महत्वपूर्ण भूमिका खेल्ने विश्वास व्यक्त गर्नुभयो।
कार्यक्रममा उपस्थित वक्ताहरूले कपडा बैंकले विपन्न, असहाय तथा आवश्यकता भएका समुदायलाई प्रत्यक्ष राहत पुर्याउने बताउँदै यस अभियानलाई निरन्तरता दिनुपर्नेमा जोड दिएका थिए। स्थानीय तह, सहकारी संस्था र समुदायबीचको सहकार्यले सहयोग र सहानुभूतिको संस्कारलाई अझ बलियो बनाउने उनीहरूको धारणा थियो।
हाल मधेस प्रदेशमा केही सातादेखि निरन्तर रूपमा बढ्दै गएको शीतलहर र चिसोका कारण गरिब, विपन्न तथा दलित समुदायका व्यक्तिहरूलाई दैनिक जीवनमा गम्भीर समस्या हुँदै आएको छ।
विशेष गरी उक्त वडामा दलित समुदायको बसोबास बढी रहेकाले जाडोबाट कसैको पनि ज्यान गुम्न नपरोस् भन्ने उद्देश्यसहित महालक्ष्मी सहकारीले सामाजिक उत्तरदायित्वअन्तर्गत कपडा बैंकको सुरुवात गरेको जनाएको छ। कपडा बैंकमार्फत प्रयोगयोग्य न्यानो कपडा संकलन गरी आवश्यक व्यक्तिसम्म निःशुल्क रूपमा पुर्याइने बताइएको छ।
आयोजकले आम नागरिकलाई घरमा प्रयोगमा नआएका तर लगाउन मिल्ने कपडा दान गरी यस मानवीय अभियानमा सहभागी हुन आग्रह गरेका छन्।
