महेश सिंह लहान सिरहा – लहान सिटी जेसीजको २४औँ पदस्थापना तथा पुरस्कार वितरण समारोह अन्तर्राष्ट्रिय जेसी उपाध्यक्ष २०२६ तथा राष्ट्रिय अध्यक्ष २०२५ जेसी सिनियर राजनी थापा ज्यूको प्रमुख आतिथ्यतामा लहानस्थित मारवाडी सेवा सदनमा भव्य रूपमा सम्पन्न भएको छ।
समारोहका अवसरमा नवनिर्वाचित अध्यक्ष जेसी बम चन्द्र चौधरीलाई औपचारिक रूपमा कार्यभार हस्तान्तरण गरिएको थियो। कार्यक्रममा लहान सिटी जेसीजका पूर्व अध्यक्षहरू बसन्त साह, राजेश चौधरी, धरनिधर अधिकारी, जितेन्द्र चौधरी, रिमु चौधरी, उमेश चौधरी, चक्रपाणी दाहाल, फिरोज शेख, सत्यनारायण पजियार, राकेश झा, कासिन्द्र यादव, उमेश यादव, अजय जेसवाल, राजु मण्डल, मुरारी प्रसाद साह, रियासत लिमि, दिपेन्द्र राज सिंह, राजा बाबु साह, विकास सारडा लगायतको उल्लेखनीय उपस्थिति रहेको थियो।
कार्यक्रममा लायन्स इन्टरनेशनलका जीएमटी को–अर्डिनेटर चक्रपाणी दाहालले जेसीजलाई नेतृत्व विकासको “महाविश्वविद्यालय” का रूपमा चिनाउँदै नयाँ जिम्मेवारी पाउने पदाधिकारीहरूले उत्तरदायित्वपूर्ण ढंगले संगठनलाई अगाडि बढाउनुपर्नेमा जोड दिनुभयो।
प्रमुख अतिथि तथा राष्ट्रिय अध्यक्ष राजनी थापा ज्यूले जेसीजलाई “अवसरहरूको समुद्र”को संज्ञा दिँदै, यसमा आबद्ध भएर व्यक्तित्व विकास, नेतृत्व क्षमता अभिवृद्धि तथा व्यवसायलाई अन्तर्राष्ट्रिय स्तरसम्म विस्तार गर्न सकिने बताउनुभयो। उहाँले फरक पहिचान निर्माण गर्न चाहने तथा आफ्नो व्यवसायलाई विश्वव्यापी रूपमा अघि बढाउन इच्छुक युवाहरूका लागि जेसीज अत्यन्तै उपयोगी मञ्च रहेको उल्लेख गर्नुभयो।
कार्यक्रमले लहान सिटी जेसीजको संगठनात्मक एकता, नेतृत्व विकास र सामाजिक उत्तरदायित्वप्रतिको प्रतिबद्धतालाई थप मजबुत बनाएको सहभागीहरूले बताएका छन्।
