महेश सिंह लहान,सिरहा –सिरहा जिल्लाको नवराजपुर गाउँपालिका– टोल मेनहा घर भई हाल लहान नगरपालिका–७ निवासी स्वर्गीय प्रमानन्द महतोको ७८ वर्षको उमेरमा असामयिक निधन भएको छ।
वि.सं. २००४ सालमा जन्मनु भएका स्व. महतो औषधि व्यवसायी तथा समाजसेवी व्यक्तित्वका रूपमा परिचित हुनुहुन्थ्यो। उहाँ नेपाल कुशवाहा कल्याण समाज क्षेत्र कार्य समिति क्षेत्र नं. १ तथा नेपाल कुशवाहा कल्याण समाज लहान नगर कार्य समितिसँग आबद्ध रहँदै सामाजिक सेवामा सक्रिय योगदान पुर्याउँदै आउनु भएको थियो।
उहाँको निधनले कुशवाहा समुदाय मात्र नभई समग्र समाजले एक असल अभिभावक, समाजसेवी तथा मार्गदर्शक व्यक्तित्व गुमाएको नेपाल कुशवाहा कल्याण समाजले जनाएको छ। समाजद्वारा जारी शोक वक्तव्यमा दिवंगत आत्माको चिरशान्ति र स्वर्गवासको कामना गर्दै शोकसन्तप्त परिवारजनप्रति गहिरो समवेदना प्रकट गरिएको छ।
स्व. प्रमानन्द महतोप्रति श्रद्धाञ्जली अर्पण गर्दै उहाँका छोरा राम अवतार महतोले बुबाको निधनको अवसरमा कुशवाहा समुदायको इतिहासमै सबैभन्दा ठूलो मृत्यु भोजको आयोजना गर्नुभएको छ। उक्त भोजमा कुशवाहा समुदायका साथै अन्य समुदायका व्यक्तिहरूको समेत उल्लेख्य सहभागिता रहेको थियो, जसमा लाखौँ रुपैयाँ बराबरको खर्च भएको जनाइएको छ।
उक्त श्रद्धाञ्जली सभा तथा मृत्यु भोज कार्यक्रममा पूर्व मन्त्री शत्रुधन प्रसाद सिंह, पूर्व युवा तथा खेलकुद मन्त्री बब्लु गुप्ता, नेपाल कुशवाहा कल्याण समाजका पूर्व केन्द्रीय अध्यक्ष तपेश्वर महतो, जिल्ला अध्यक्ष राम अवतार महतो, नेपाल कुशवाहा विद्यार्थी संघका केन्द्रीय अध्यक्ष मुकेश महतो, समाजसेवीहरू राम नारायण महतो, दिनेश महतो, राम उदगार महतो, राजा राम महतो, प्रेम कुशवाहा, लहान–३ का वडा अध्यक्ष राम दियाल महतो लगायत हजारौँ कुशवाहा समुदायका व्यक्तिहरूको उपस्थिति रहेको मृतकका छोरा राम अवतार महतोले जानकारी दिनुभयो।
छोरा महतोले “अन्नदान महादान हो” भन्ने मान्यतालाई आत्मसात् गर्दै बुबाको मृत्यु भोज कुशवाहा समुदायको इतिहासमै उदाहरणीय र स्मरणीय बनेको बताउँदै उक्त कार्यक्रम व्यवस्थित, मर्यादित र शान्तिपूर्ण रूपमा सम्पन्न भएको जानकारी दिनुभयो।
