महेश सिंह सिरहा – विद्यार्थीहरूको शारीरिक, मानसिक तथा बौद्धिक विकासलाई केन्द्रमा राख्दै सिरहाको लहान नगरपालिका–१२ भोटियाटोलस्थित सलहेश फुलवारी बोर्डिङ स्कुलमा वार्षिक खेलकुद दिवस २५ गते आइतबार देखि सुरु भएको छ उक्त प्रतियोगिता २९ गते सम्पन्न हुने भएको छ।
पछिल्लो लामो समयदेखि शैक्षिक क्षेत्रमा सक्रिय रहँदै आएको उक्त विद्यालयले हरेक वर्ष दुई दर्जनभन्दा बढी खेलकुद प्रतियोगिता सञ्चालन गर्दै आएको छ। यस वर्षको खेलकुद दिवसमा क्रिकेट, फुटबल, कबड्डी, दौड प्रतियोगिता, जम्पिङ, स्लो साइकल रेस, म्युजिकल चेयर, मार्बल स्पून, स्किपिङ, जुत्ता दौड, इनपुट–आउटपुट खेल, बुक ब्यालेन्सिङ, चेस, चकलेट रेस, कप बिल्डिङ, बिस्कुट ब्यालेन्सिङलगायतका रोचक तथा सृजनात्मक खेलहरू समावेश गरिएका थिए।
खेलहरू विद्यार्थीहरूको उमेर समूहअनुसार विभाजन गरी सञ्चालन गरिएकाले सबै तहका विद्यार्थीहरूको सक्रिय सहभागिता देखिएको थियो। खेलकुद मैदानभरि विद्यार्थीहरूको उत्साह, प्रतिस्पर्धात्मक भावना र अनुशासन झल्किन्थ्यो। कार्यक्रममा उपस्थित अभिभावक तथा शिक्षकहरूले विद्यालयको शैक्षिक दृष्टिकोणसँगै खेलकुदलाई समान महत्व दिएकोमा प्रशंसा गरेका छन्।
विद्यालयका प्रिन्सिपल शिवकान्त चौधरीका अनुसार खेलकुदले विद्यार्थीहरूमा अनुशासन, सहकार्य, आत्मविश्वास, नेतृत्व क्षमता र सकारात्मक सोचको विकास गराउँछ। “पढाइसँगै खेलकुदलाई अनिवार्य अंगका रूपमा लिँदै आएका छौं, यस्ता कार्यक्रमलाई निरन्तरता दिइन्छ,” उनले बताए।
त्यस्तै विद्यालयकी संस्थापक (फाउन्डर) बबिता कुमारी चौधरीले प्रतियोगितामा उत्कृष्ट प्रदर्शन गर्ने विद्यार्थीहरूलाई पुरस्कार तथा प्रमाणपत्र प्रदान गरिने जानकारी दिँदै बालबालिकाको सर्वाङ्गीण विकास नै विद्यालयको मूल लक्ष्य रहेको बताइन्।
उक्त क्षेत्रमै गुणस्तरीय शिक्षाको केन्द्रका रूपमा परिचित सलहेश फुलवारी बोर्डिङ स्कुलले हालसम्म हजारौं विद्यार्थीलाई सीप, अनुशासन र व्यवहारिक शिक्षासहित तयार पार्दै आएको छ। विद्यालयले आगामी दिनमा शैक्षिक गुणस्तरसँगै खेलकुद, सृजनात्मक र अतिरिक्त क्रियाकलापलाई अझ विस्तार गर्ने जनाएको छ।
