विकास र सुशासनको एजेन्डासहित रामचन्द्र यादव मतदातामाझ

महेश सिंह लहान सिरहा,- निर्वाचन क्षेत्र नम्बर–२ मा
सिरहा निर्वाचन क्षेत्र नम्बर–२ अन्तर्गत नवराजपुर गाउँपालिका–२ मझौरामा नेपाली काङ्ग्रेसका उम्मेदवार रामचन्द्र यादवले मतदातासँग भेटघाटलाई तीव्रता दिएका छन्। घरदैलो अभियानमार्फत उनी स्थानीय नागरिकसँग प्रत्यक्ष संवाद गर्दै मतदाताका गुनासा, सुझाव र अपेक्षाहरू सुन्दै अघि बढिरहेका छन्।
यादवलाई भेट्न र आफ्ना समस्या राख्न मतदाताहरू स्वयं अग्रसर देखिएका छन्। स्थानीयस्तरमा विकास, रोजगारी, कृषि सुधार, शिक्षा र स्वास्थ्य सेवाको पहुँच विस्तार जस्ता विषयमा मतदाताहरूले चासो व्यक्त गरेका छन्। उम्मेदवार यादवले जनताको अपेक्षा अनुसार काम गर्ने प्रतिबद्धता व्यक्त गर्दै आफू विकास र सुशासनको एजेन्डा लिएर मैदानमा उत्रिएको बताएका छन्।
“जनताले खोजेको नेतृत्व जनताकै बीचमा हुनुपर्छ,” भन्दै यादवले निर्वाचन जितेपछि पनि निरन्तर जनतासँग सम्पर्कमा रहने प्रतिवद्धता जनाएका छन्।
हाल उनी निरन्तर घरदैलो तथा भेटघाट कार्यक्रममा व्यस्त रहँदै चुनावी अभियानलाई प्रभावकारी बनाउने प्रयासमा छन्। मझौरासहित आसपासका टोल–बस्तीमा काङ्ग्रेस कार्यकर्तासहितको टोलीले प्रचार–प्रसारलाई तीव्र बनाएको छ।