महेश सिंह, लहान सिरहा – सिरहा निर्वाचन क्षेत्र नम्बर–१ मा नेपालका लागि नेपाली पार्टीका उम्मेदवार राम कुमार साह ‘सनातनी’ले आफ्नो चुनावी अभियानलाई फरक शैलीमा अघि बढाइरहेका छन्। परम्परागत आमसभा र नाराभन्दा बढी उनी प्रत्यक्ष भेटघाट, सानो समूह संवाद र टोलस्तरीय अन्तरक्रियालाई प्राथमिकता दिँदै देखिएका छन्।
घरदैलोका क्रममा साहले केवल धार्मिक एजेन्डा मात्र होइन, स्थानीय विकास, रोजगारी र सुशासनका विषय पनि उठाउँदै आएका छन्। “राजनीति सेवाको माध्यम हो, व्यापारको होइन,” भन्ने सन्देश दिँदै उनले युवापुस्तालाई राजनीति प्रति सचेत र सक्रिय हुन आग्रह गरेका छन्।
उनले मतदातासँग खुला छलफल गर्दै शिक्षा, स्वास्थ्य, कृषि र साना व्यवसाय प्रवर्द्धनका विषयमा आफ्ना योजना प्रस्तुत गरेका छन्। विशेषगरी वैदेशिक रोजगारीका कारण गाउँ खाली हुँदै गएको अवस्थालाई रोक्न स्थानीय स्तरमै अवसर सिर्जना गर्नुपर्नेमा उनले जोड दिएका छन्।
युवा र पहिलोपटकका मतदाता लक्षित अभियान
साहको अभियानमा युवा स्वयंसेवकहरूको उल्लेख्य उपस्थिति देखिन्छ। सामाजिक सञ्जालमार्फत सन्देश प्रवाह, सानो–सानो छलफल कार्यक्रम र सांस्कृतिक भेला मार्फत उनले पहिलोपटक मतदान गर्ने मतदातालाई आकर्षित गर्ने प्रयास गरेका छन्।
उनी “रक्सी र पैसाको राजनीति अन्त्य गरौं” भन्ने नारासहित स्वच्छ निर्वाचनको पक्षमा उभिएका छन्। मतदातालाई विवेकपूर्ण निर्णय लिन आग्रह गर्दै उनले राजनीतिक संस्कार परिवर्तनको आवश्यकता औंल्याएका छन्।
पहिचान र स्थानीय नेतृत्वको सवाल
सिरहाको सितापुर क्षेत्रसहित विभिन्न बस्तीमा पुगेर साहले स्थानीय पहिचान, परम्परा र सांस्कृतिक मूल्य संरक्षणलाई विकाससँग जोडेर प्रस्तुत गरेका छन्। राष्ट्रिय मुद्दालाई स्थानीय आवश्यकता र जनजीवनसँग कसरी समन्वय गर्ने भन्ने प्रश्नमा उनले वैकल्पिक दृष्टिकोण राख्ने प्रयास गरेका छन्।
सिरहा–१ मा विभिन्न दल तथा स्वतन्त्र उम्मेदवारबीच कडा प्रतिस्पर्धा भइरहेका बेला साहले ठूला शक्ति र परम्परागत संरचनालाई चुनौती दिने शैली अपनाएका छन्। सानो तर प्रतिबद्ध टोलीसहित उनी मतदातासँग सीधा सम्पर्क बढाउँदै छन्।
निर्वाचन नजिकिँदै जाँदा उनको फरक शैली र मुद्दामुखी प्रस्तुति मतदातामाझ कति प्रभाव पार्छ भन्ने चासो बढ्दै गएको छ। सिरहा–१ को चुनावी प्रतिस्पर्धामा यसपटक मतदाताको विवेक, मुद्दा र मूल्य–मान्यताको बहस केन्द्रीकृत बन्दै गएको देखिन्छ।
