महेश सिंह, लहान – सिरहा निर्वाचन क्षेत्र नम्बर–१ मा चुनाव नजिकिँदै जाँदा चुनावी माहोलसँगै स्थानीय राजनीतिक समीकरण पनि तीव्र रूपमा फेरिँदै गएको छ। यसैक्रममा जनमत पार्टी का उम्मेदवार रामस्वरुप चौधरीले लहान नगरपालिका–२४ मा घरदैलो अभियानलाई संगठन विस्तार र जनसमर्थन सुदृढीकरणको अवसरका रूपमा उपयोग गरेका छन्।
घरदैलो कार्यक्रमलाई केवल मत माग्ने अभियानमा सीमित नराखी उनले स्थानीय टोलस्तरमा सानो–सानो समूहमा छलफल गर्दै पार्टीको संगठनात्मक संरचना बलियो बनाउने रणनीति अघि सारे। प्रत्येक टोलमा स्वयंसेवक परिचालन, युवा समूहसँग समन्वय र महिला प्रतिनिधिहरूसँग प्रत्यक्ष छलफल उनको अभियानको मुख्य विशेषता देखियो।
चौधरीले चुनावी प्रतिस्पर्धा कडा बन्दै गएको उल्लेख गर्दै भने, “यसपटक सिरहा–१ मा मतदाताले विकल्प खोजिरहेका छन्। जनताको विश्वास जित्न संगठन बलियो हुनुपर्छ, अनि मात्रै एजेन्डा कार्यान्वयन सम्भव हुन्छ।” उनले स्थानीय तहदेखि केन्द्रसम्म जनमत पार्टीको प्रभाव विस्तार गर्न आफू प्रतिबद्ध रहेको बताए।
घरदैलोका क्रममा आर्थिक गतिविधि सुस्त हुनु, युवाको वैदेशिक पलायन र कृषिमा लगानी अभाव जस्ता मुद्दा प्रमुख रूपमा उठेका थिए। चौधरीले रोजगारी सिर्जना र साना उद्यम प्रवर्द्धनलाई आफ्नो प्राथमिक एजेन्डा बनाएको स्पष्ट पारे।
राजनीतिक विश्लेषकहरूका अनुसार सिरहा–१ मा यसपटक परम्परागत दलहरूबीच मात्र होइन, वैकल्पिक शक्तिहरूबीच पनि कडा प्रतिस्पर्धा देखिएको छ। चौधरीले चुनावी अभियानलाई संगठन सुदृढीकरण, नयाँ मतदाता आकर्षण र स्थानीय मुद्दाको राजनीतिक रूपान्तरणतर्फ केन्द्रित गर्दै अघि बढाएका छन् ।
