महेश सिंह लहान – सिरहाको लहान नगरपालिका–२ स्थित गोल्डेन फ्युचर एजुकेशनल एकेडेमी ले वार्षिक ‘स्कुल स्पोर्ट्स सप्ताह’ कार्यक्रम सुरु गरेको छ। विद्यालयले प्रत्येक वर्ष आयोजना गर्दै आएको खेलकुद सप्ताह यसपटक १२ गतेदेखि १८ गतेसम्म सञ्चालन हुने जनाएको छ। उद्घाटन समारोह उत्साहपूर्ण वातावरणमा सम्पन्न भएको विद्यालय प्रशासनले जनाएको छ।
कार्यक्रमको अध्यक्षता विद्यालयका संस्थापक प्रिन्सिपल उपेन्द्र यादव ले गरेका थिए। उनले विद्यार्थीको शैक्षिक उपलब्धिसँगै शारीरिक तथा मानसिक विकासका लागि खेलकुद अपरिहार्य रहेको बताए। “पढाइसँगै खेलकुदले अनुशासन, आत्मविश्वास र नेतृत्व क्षमता विकास गर्छ,” उनले भने।
समारोहका प्रमुख अतिथि शिया राम यादव ले आफ्नो वडामा सञ्चालित बोर्डिङ्ग विद्यालयहरूमध्ये गोल्डेन फ्युचर नमूना विद्यालयका रूपमा स्थापित भएको बताए। विद्यार्थीको सर्वाङ्गीण विकासका लागि अतिरिक्त क्रियाकलाप आवश्यक रहेको उनको भनाइ थियो। “पुस्तकमा सीमित शिक्षा मात्र पर्याप्त हुँदैन, व्यवहारिक सीप विकासका लागि खेलकुद महत्त्वपूर्ण छ,” उनले भने।
विशिष्ट अतिथि समाजसेवी शंकरप्रसाद गुप्ता ले कक्षाकोठाभित्रको शिक्षासँगै अतिरिक्त गतिविधिले विद्यार्थीलाई सक्षम नागरिक बनाउन सहयोग गर्ने बताए।
कार्यक्रममा पत्रकार फिरोज शेख र आशिष साह सहित अभिभावक र विद्यार्थीहरूको उल्लेखनीय उपस्थिति रहेको थियो।
खेलकुद सप्ताहअन्तर्गत विभिन्न विधाका खेल प्रतियोगिता सञ्चालन गरिने विद्यालयले जनाएको छ। उद्घाटन सत्रमै विद्यार्थीहरूको उत्साहजनक सहभागिता देखिएको आयोजकले जनाएको छ। विद्यालयले खेलमार्फत प्रतिस्पर्धात्मक भावना, सहकार्य र नेतृत्व क्षमताको विकास गर्ने उद्देश्य राखेको छ।
