महेश सिंह, लहान -महिला तथा सीमान्तकृत समुदायमा लक्षित संरक्षण परियोजना (SAMRAKSHYAN Project) अन्तर्गत संरक्षण, जीविकोपार्जन, लैंगिक समानता तथा सामाजिक समावेशीकरण सम्बन्धी दुई दिने तालिम सम्पन्न भएको छ।
लहान नगरपालिकाको समन्वयमा सञ्चालन गरिएको उक्त तालिममा संरक्षण अभियान अन्तर्गत गठन भएका ३२ वटा समूहका संरक्षण अभियानता तथा समूहका नेतृत्वकर्ताहरूको सहभागिता रहेको थियो। तालिमले समुदायस्तरमा लैंगिक समानता, सामाजिक समावेशीकरण, संरक्षण तथा जीविकोपार्जनका विषयमा ज्ञान र क्षमता अभिवृद्धि गर्न महत्वपूर्ण योगदान पुर्याएको आयोजकले जनाएको छ।
कार्यक्रमका बारेमा जानकारी दिँदै परियोजनाकी प्रोग्राम अधिकृत शोभा पासमानले समुदायमा रहेका महिला तथा सीमान्तकृत वर्गलाई सशक्त बनाउने उद्देश्यले तालिम सञ्चालन गरिएको बताइन्। उनले तालिमबाट सहभागीहरूलाई सामाजिक विभेद न्यूनीकरण, नेतृत्व विकास तथा समुदायमा सकारात्मक परिवर्तन ल्याउन आवश्यक सीप प्राप्त भएको उल्लेख गरिन्।
तालिमको अनुगमन राष्ट्रिय कृषक समूह महासंघ नेपालका मधेश प्रदेश सचिव यामुन प्रसाद यादवले गरेका थिए। अनुगमनका क्रममा उनले समुदायको सशक्तीकरण र समावेशी विकासका लागि यस्ता कार्यक्रम अत्यन्त प्रभावकारी रहेको बताउँदै सिकेका ज्ञान र सीपलाई व्यवहारमा लागू गर्न सहभागीहरूलाई आग्रह गरे।
सहभागी विजय महतोले तालिम निकै प्रभावकारी र उपलब्धिमूलक रहेको प्रतिक्रिया दिए। उनले समाजमा रहेका विभिन्न सामाजिक चुनौतीहरूलाई सम्बोधन गर्न तथा नेतृत्व क्षमता अभिवृद्धि गर्न यस्ता तालिम समय-समयमा सञ्चालन हुन आवश्यक रहेको बताए।
CARE, FECOFUN, Jersey Overseas Aid (JOA) लगायतका साझेदार संस्थाको सहयोगमा सञ्चालित संरक्षण परियोजनाले महिला, दलित, जनजाति तथा अन्य सीमान्तकृत समुदायको सामाजिक, आर्थिक तथा नेतृत्व विकासमा विशेष जोड दिँदै आएको छ।
