महेश सिंह लहान सिरहा – लैङ्गिक हिंसा विरुद्धको १६ दिने अभियान तथा अन्तर्राष्ट्रिय मानव अधिकार दिवसको अवसरमा मादिना मञ्जरी (नजबुल) फाउन्डेसनद्वारा आयोजना गरिएको विशेष कार्यक्रम मंसिर २४ गते भव्य रूपमा सम्पन्न भयो। महिला, बालबालिका तथा जेष्ठ नागरिक मन्त्रालय र शिक्षाका लागि राष्ट्रिय अभियान नेपालको सहयोगमा गरिएको कार्यक्रम ‘शिक्षाको सवालमा पहिचानको खोजी’ शीर्षकसहित अन्तरक्रियात्मक रूपमा प्रस्तुत गरिएको थियो।
कार्यक्रममा प्रमुख अतिथिका रूपमा कोशी प्रदेशसभा सदस्य हाजी इस्राइल मन्सुरी उपस्थित थिए।
विशेष अतिथिमा प्रदेशसभा सदस्य गिता रेग्मी, प्रमुख जिल्ला अधिकारी धर्मराज जोशी, जिल्ला प्रहरी कार्यालय प्रमुख राजन चापागाईं, न्यायिक समिति सदस्य मिरा बिके, तथा कार्यपालिका सदस्य गिता उप्रेतीलगायतको सहभागिता थियो।
कार्यक्रममा महिला ७७ र पुरुष २६ गरी कुल १०३ जना सहभागी थिए। उपस्थित प्रतिनिधिहरूले लैङ्गिक हिंसा अन्त्य, समान शिक्षा पहुँच, मानव अधिकार संरक्षण तथा प्रविधिको सही प्रयोगका विषयमा धारणा राखे। ‘आसनमा महिला, भाषणमा महिला, शासनमा महिला’ जस्ता नारा कार्यक्रमभरि प्रतिध्वनित भएका थिए।
विभिन्न क्षेत्रमा सक्रिय रहेका १० महिलालाई सम्मान गरिएको कार्यक्रम आभाशा राष्ट्रिय अभियानका केन्द्रीय संयोजक तथा फाउन्डेसनका अध्यक्ष **नजबूल खान (निलम)**को अध्यक्षतामा सम्पन्न भयो। सम्मानित महिलाहरूमा—
मिरा बिके (न्यायिक समिति सदस्य)
गिता उप्रेती (कार्यपालिका सदस्य)
ज्योती मिश्रा (शिक्षा क्षेत्र)
कमला कार्की (सशस्त्र प्रहरी)
भुवनकुमारी मिश्रा (नेपाल प्रहरी)
मणी राई (अपाङ्गता क्षेत्र)
रजिया सुल्तान (महिला मानव अधिकारकर्मी, मुस्लिम समुदाय)
कमला बस्नेत कटुवाल (महिला अधिकारकर्मी)
सुष्मा चौधरी (आभाशा अभियन्ता, सौन्दर्य सेवा क्षेत्र)
पारु कार्की (आभाशा युवा महिला अभियन्ता)
समावेश थिए।
चारवटा गीत प्रस्तुति तथा अन्तरक्रियात्मक सत्रमार्फत महिलालाई पहिचान, शिक्षा र सुरक्षा सम्बन्धी मुद्दाहरूमा सचेत गराइएको थियो। सहभागीहरूले महिलाको पहिचान आफ्नो नामबाट हुनुपर्ने र सामुदायिक तथा पारिवारिक संरचनामा लैङ्गिक समानता कायम गर्न आवश्यकताका विषयमा जोड दिए।
कार्यक्रम सञ्चालक सरिता राई र व्यवस्थापन टोलीका सानु चौधरीले अभियानका सबै सहयोगी संस्था तथा सहभागीहरूलाई धन्यवाद व्यक्त गर्दै १६ दिने अभियान औपचारिक रूपमा समापन भएको घोषणा गरे।
