महेश सिंह लहान –सिरहाको लहान ८ स्थित लोटस इङ्गलिस बोर्डिङ स्कुलद्वारा आयोजित अन्तरविद्यालय खेलकुद प्रतियोगिताको पुरस्कार वितरण कार्यक्रम भव्य रूपमा सम्पन्न भएको छ। ‘संस्कारसहितको शिक्षा नै आधुनिक समाजको आवश्यकता हो’ भन्ने नाराका साथ विद्यालयले प्रत्येक वर्ष अतिरिक्त क्रियाकलापमा विशेष जोड दिंदै आएको छ।
विद्यालयले विद्यार्थीहरूको शारीरिक, मानसिक र संवेगात्मक विकासलाई प्रवर्द्धन गर्न वार्षिक रूपमा अन्तरविद्यालय खेलकुद प्रतियोगिता आयोजना गर्दै आएको छ। यस वर्ष पनि विभिन्न खेलकुद प्रतियोगिता आयोजना गरिएको थियो, जसमा विद्यालयका विद्यार्थीहरूले उत्साहपूर्वक भाग लिएका थिए।
प्रतियोगितामा उत्कृष्ट प्रदर्शन गर्ने विद्यार्थीहरूलाई नगद पुरस्कार, प्रमाणपत्र र पदक प्रदान गरिएको छ। साथै, उनीहरूका अभिभावकलाई पनि विशेष सम्मान गरिएको छ। पुरस्कार वितरण समारोहमा विद्यालयका प्रधानाध्यापक सुदीप चौधरीले खेलकुदको महत्वबारे प्रकाश पार्दै विद्यार्थीहरूलाई निरन्तर प्रतिभा प्रस्फुटन गर्न प्रेरित गर्ने प्रतिबद्धता व्यक्त गरे।
“खेलकुद केवल शारीरिक गतिविधि मात्र होइन, यसले विद्यार्थीमा अनुशासन, सहनशीलता, नेतृत्व क्षमता र आत्मविश्वास विकास गर्छ,” प्रधानाध्यापक चौधरीले भने।
विद्यालयका भ्वाइस प्रिन्सिपल अरुण चौधरीका अनुसार प्रतियोगिताको मुख्य उद्देश्य विद्यार्थीलाई खेलकुदप्रति रुचि बढाउनु र उनीहरूको प्रतिभा उजागर गर्नु हो। “हाम्रो विद्यालयले शिक्षा मात्र होइन, अतिरिक्त क्रियाकलापमा पनि उत्तिकै ध्यान दिएको छ,” उनले भने।
स्थानीय अभिभावकहरू र विद्यालय व्यवस्थापन समितिले पनि यस्तो प्रतियोगिता विद्यार्थीहरूको बहुपक्षीय विकासका लागि महत्वपूर्ण रहेको बताए। विद्यालयले शिक्षाको गुणस्तरलाई कायम राख्दै अतिरिक्त क्रियाकलापमार्फत विद्यार्थीको सर्वाङ्गीण विकास गर्ने लक्ष्य लिएको छ।
गुणस्तरीय शिक्षाका कारण विद्यालयमा विद्यार्थीहरूको आकर्षण बढ्दै गएको छ। हाल लोटस इङ्गलिस बोर्डिङ स्कुलमा एक हजारभन्दा बढी विद्यार्थी अध्ययनरत छन्। प्रतियोगिताको सफल समापनसँगै विद्यालयले आगामी वर्ष पनि अझ भव्य रूपमा खेलकुद कार्यक्रम आयोजना गर्ने घोषणा गरेको छ।
