महेश सिंह लहान सिरहा – सखुवानन्कारकट्टी गाउँपालिका–२ पटना र लतियाहीको बीच कटनिया नदीको डिलमा आयोजित विवाह पंचमी मेला महोत्सव मिति २०८२ मङ्सिर ९ र १० गते उत्साहपूर्ण रूपमा सम्पन्न भएको छ।
महोत्सवको मुख्य आकर्षण मानिएको परम्परागत कुस्ती प्रतियोगिताको रिबन काटेर नेपाली कांग्रेसका जिल्ला सभापति रामचन्द्र यादवले भव्य उद्घाटन गरेका थिए। उद्घाटन समारोह वडा अध्यक्ष तनुक लाल यादवको अध्यक्षतामा सम्पन्न भएको थियो।
कुस्ती अवलोकनका लागि कटनिया नदी किनारमा हजारौँ दर्शकहरूको उपस्थितिले वातावरण रोमाञ्चक बनेको थियो। स्थानीय, छिमेकी गाउँका बासिन्दा तथा युवाहरूको ठूलो भीडले प्रतियोगिता स्थल खचाखच भरिएको थियो।
प्रतियोगितामा विभिन्न ठाउँबाट आएका चर्चित पहलवानहरूको भिडन्त, दाँवपेच र कौशलले दर्शकलाई निरन्तर रोमाञ्चित बनायो। आयोजक समितिका अनुसार विवाह पंचमी मेलाले स्थानीय संस्कृति, परम्परा र खेलकुद प्रवर्द्धनमा महत्वपूर्ण भूमिका खेलेको छ।
महोत्सव सफलतापूर्वक सम्पन्न भएपछि आयोजकले सबै सहभागी, समर्थक र आगन्तुकप्रति हार्दिक आभार व्यक्त गरेका छन्।
