महेश सिंह लहान सिरहा – गोलबजार नगरपालिका–७ मा लैङ्गिक हिंसा विरुद्धको १६ दिने अभियानअन्तर्गत विश्व दासता उन्मूलन दिवसको अवसरमा प्रश्रमिक बिना हुने घरेलु सेवामूलक कामको मूल्य, महत्व र सम्मानबारे समुदायस्तरीय अभिमुखीकरण कार्यक्रम सम्पन्न भएको छ।
कार्यक्रममा ३७ जना सहभागी रहे । सहभागीहरूलाई घरेलु कामदार, सेवामूलक काम, दासता, हरुवा–चरुवा परम्परा तथा नेपालमा पुष्पित हुँदै आएको अदृश्य श्रमको सामाजिक–सांस्कृतिक प्रभाव बारे विस्तृत जानकारी दिइयो।
अभिमुखीकरणमा हालका अवधारणाले ‘दासता’ के हो, घरभित्र गरिने तर पहिचान र सम्मान नपाउने श्रम किन अदृश्य मानिन्छ, तथा घरेलु कामदारको श्रमलाई कसरी मर्यादा र अधिकारसहित मूल्याङ्कन गर्न सकिन्छ भन्ने विषयमा विस्तृत छलफल भयो।
सहभागीहरूले विशेषगरी समुदायमा वर्षौंदेखि जरा गाडेर बसेको हरुवा–चरुवा तथा शासकीय–सामाजिक संरचनाले थोपरेका दासतामूलक प्रथाहरू कसरी भत्काइँदै आएका छन्, र यसलाई अझ कसरी उन्मूलन गर्न सकिन्छ भन्ने विषयमा विचार–विमर्श गरे।
कार्यक्रमले घरेलु सेवामूलक कामलाई केवल ‘घरेलु जिम्मेवारी’ नभई श्रमिक अधिकार जोडिएको महत्वपूर्ण सेवा का रूपमा हेर्ने दृष्टिकोण विकास गर्न सहयोग पुग्ने आयोजकका प्रतिनिधिहरूले बताएका छन्।
