महेश सिंह लहान –लैङ्गिक हिंसा विरुद्धको १६ दिने अभियानको अवसरमा महोत्तरीमा सुरक्षा आवास व्यवस्थापन तथा लैङ्गिक हिंसा प्रभावितको न्यायिक प्रक्रियामा सहजता विषयक अन्तरक्रिया कार्यक्रम सम्पन्न भएको छ। कार्यक्रम जलेश्वरस्थित जिल्ला प्रशासन कार्यालयको संयोजन र WOREC नेपाल को आयोजनामा भएको हो।
अभियान नोभेम्बर २५ देखि डिसेम्बर १० सम्म चल्दै आएको छ। यस वर्षको नारामा—
“प्रविधिको सही प्रयोग गरौँ: लैङ्गिक हिंसा अन्त्य गरौँ”
“व्यवस्था मात्र होइन सोभामा गरौँ सुधार: युवा/महिला नै हुन् सामाजिक रूपान्तरणको आधार”
समेटिएको छ।
ओरेक नेपालकी मधेस प्रदेश संयोजक बिना सिंहका अनुसार कार्यक्रममा महोत्तरीका सबै सरोकारवाला — स्थानीय तहका प्रतिनिधि, सुरक्षा निकाय, न्यायिक निकाय, महिला समूह, सामाजिक अभियन्ता र विभिन्न संघ–संस्थाका प्रतिनिधिहरूको उल्लेखनीय उपस्थिति रहेको थियो।
सिंहका अनुसार अन्तरक्रियामा लैङ्गिक हिंसा प्रभावितहरू न्याय खोज्दा भोग्ने चुनौती, सुरक्षित आवासको आवश्यकता, मनो–सामाजिक सहयोग, कानुनी सहजीकरण र राज्य संयन्त्रको भूमिकाबारे विस्तृत छलफल भएको थियो। सहभागीहरूले विशेष गरी ग्रामीण महिलाहरू न्यायिक प्रक्रियामा बादलिएका अवरोध पहिचान गर्दै ती समस्या समाधानका लागि अन्तरसंस्थागत समन्वय आवश्यक रहेकोमा जोड दिए।
कार्यक्रममा बोल्नेमाहरूले प्रविधिको सही प्रयोगले हिंसा रोकथाम तथा उजुरी प्रक्रियामा सहजता ल्याउने भन्दै डिजिटल पहुँच, सचेतना अभिवृद्धि र सामाजिक रूपान्तरणमा युवाको भूमिकालाई अत्यन्त महत्वपूर्ण बताए।
WOREC नेपालले लैङ्गिक हिंसा पीडितका लागि सुरक्षा आवास, कानुनी परामर्श, मनो–सामाजिक सेवा र समुदायस्तरमा निरन्तर निगरानी तथा सचेतना अभियानलाई अझ प्रभावकारी बनाउँदै लैजाने प्रतिबद्धता जनाएको छ।
कार्यक्रमले १६ दिने अभियानलाई स्थानीय तहमा संस्थागत रूपमा विस्तार गर्ने तथा लैङ्गिक हिंसा रोकथाममा सहकार्य बढाउने संदेश दिएको आयोजकले जनाएको छ।
