महेश सिंह लहान सिराहा –गोलबजार स्पोर्ट्स क्लबको आयोजना तथा गोलबजार नगरपालिकाको मुख्य सहयोगमा ‘प्रथम गोलबजार नगर स्तरीय विद्यालय फुटबल प्रतियोगिता–२०८२’ आज औपचारिक रूपमा सुरु भएको छ। उद्घाटन समारोहका प्रमुख अतिथि गोलबजार नगरपालिका नगर प्रमुख श्याम कुमार श्रेष्ठले प्रतियोगिताको शुभारम्भ गर्दै विद्यालय–स्तरमै फुटबल प्रतिभा पहिचान र विकासमा यो प्रतियोगिता महत्वपूर्ण मञ्च हुने बताएका हुन्।
मेयर श्रेष्ठले विद्यालयभित्र ओझेलमा रहेका खेल प्रतिभालाई उजागर गर्दै “गोलबजारका युवाहरूलाई पेशागत खेलकुदतर्फ उन्मुख गराउन यस्ता कार्यक्रम आधार साबित हुने” धारणा राखे।
उद्घाटन समारोहमा प्याब्सनका केन्द्रीय सचिव बिष्णु न्यौपानेले आगामी दिनहरूमा खेलकुद विकासका कार्यक्रमहरूमा गोलबजार स्पोर्ट्स क्लबसँग सहकार्य गर्दै लैजाने जानकारी दिए।
त्यसैगरी, मधेस खेलकुद परिषद्का सदस्य निशेष कुमार श्रेष्ठ, जनता नमुना माविका अध्यक्ष रामकुमार महतो, बाल विकास आवासीय विद्यालयका प्रतिनिधि जीवन यादव, र नेचुरल एकेडेमीका प्रिन्सिपल रामकुमार यादवले खेलकुदले विद्यार्थीको अनुशासन, नेतृत्व क्षमता र शारीरिक विकासमा ठूलो योगदान दिने बताएका छन्।
कार्यक्रममा गोलबजार नगरप्रवक्ता तथा वडा नं. ६ का अध्यक्ष सञ्जित लामाको विशेष उपस्थिति थियो।
पहिलो खेलमा श्री शारदा स्कुल गोलबजार–४ ले श्री जनता प्राविधिक मावि गोलबजार–४ लाई ०–१ गोलअन्तरले पराजित गर्दै जित हात पारेको छ। सो खेलका म्यान अफ द म्याच क्याप्टेन अभिदय जर्घा मगर घोषित भए।
दोस्रो खेलमा श्री शुभश्री स्कुल गोलबजार–६ र श्री बुढानिलकण्ठ बोर्डिङ स्कुल गोलबजार–४ बिचको प्रतिस्पर्धा निर्धारित समयसम्म ०–० को बराबरीमा टुंगिएको थियो। खेलको नतिजा ट्राइब्रेकरबाट लिँदा शुभश्री स्कुले ८–७ गोलअन्तरले जित निकाल्दै दोस्रो चरणमा प्रवेश गरेको छ।दोस्रो खेलमा युवल मगर म्यान अफ द म्याच घोषित भए।
प्रतियोगितामा सामुदायिक तथा संस्थागत गरी १४ विद्यालय टोलीहरू सहभागी छन्।
उद्घाटन समारोह क्लबका अध्यक्ष रन्जित लामाको अध्यक्षता, खेलकर्मी कसम लामाको सञ्चालन तथा क्लबका सचिव नरेश लामाको स्वागत मन्तव्यसँग सम्पन्न भएको थियो। कार्यक्रममा सहभागी विद्यालयहरूको उत्साहपूर्ण उपस्थिति थियो। साथै, हिमालयन पब्लिक स्कुल (गोलबजार–६) र नेचुरल एकेडेमी (गोलबजार–४) ले प्रस्तुत गरेको सांस्कृतिक नृत्यले वातावरणलाई झन् आकर्षक बनाएको थियो।
