महेश सिंह लहान- बलान बिहुल गाउँपालिकाका पूर्व प्रमुख प्रशासकीय अधिकृत मुसहरु साह आज औपचारिक रूपमा सेवाबाट अवकास भएका छन्। पालिकामा लामो समयसम्म प्रशासकीय नेतृत्व सम्हाल्दै उल्लेखनीय योगदान पुर्याएका साहलाई गाउँपालिकाले उच्च सम्मानका साथ बिदाइ गरेको छ।
बिदाइ कार्यक्रमका सहभागीहरूले साहले प्रशासनिक सुशासन, सेवा प्रवाहको सहजता, योजनाको प्रभावकारी कार्यान्वयन तथा पालिकाको संस्थागत विकासमा पुर्याएको भूमिकालाई विशेष रूपमा स्मरण गरेका थिए।
गाउँपालिका अध्यक्ष खेमचन्द्र यादवले साहको सक्रियता, इमान्दारितापूर्ण नेतृत्व र जनमुखी प्रशासनिक शैली बलान बिहुलका लागि प्रेरणा बन्ने बताउँदै भने, “हामी उहाँको योगदानलाई सधैं सम्झिरहनेछौँ। अवकास पछिको जीवन देश र जनताको सेवामा अझ क्रान्तिमय रहोस् भन्ने शुभकामना व्यक्त गर्दछु।”
कार्यक्रममा उपस्थित जनप्रतिनिधि, कर्मचारी तथा स्थानीयहरूले फूलमाला, अविर र सम्मानपत्र प्रदान गरी साहलाई सफल र सम्मानजनक सेवानिवृत्त जीवनका लागि शुभकामना व्यक्त गरेका थिए।
अधिकृत साहले अवकासपछि पनि समाज, विकास र सुशासन प्रवर्द्धनका क्षेत्रमा आफू उपयोगी रहिरहने प्रतिबद्धता व्यक्त गरेका थिए।बिदाइ कार्यक्रम भावनात्मक तथा गरिमामय वातावरणमा सम्पन्न भएको आयोजक समितिले जनाएको छ।
