सोनवर्षामा एन.सि.सि. क्याडेटसँग निरीक्षण तथा अन्तरक्रिया

महेश सिंह लहान सिरहा – जनता नमुना प्राविधिक धार माध्यमिक विद्यालय, सोनवर्षामा सञ्चालनमा रहेको एन.सि.सि. (NCC) तालिममा सहभागी क्याडेटहरूको निरीक्षण तथा अन्तरक्रिया कार्यक्रम सम्पन्न भएको छ।
उक्त कार्यक्रममा NCC Alumni Association (NCCAA) मधेस प्रदेश सचिव लक्ष्मण शर्मा ज्यूको प्रमुख उपस्थिति रहेको थियो। कार्यक्रमका क्रममा उहाँले तालिममा सहभागी ३० जना एन.सि.सि. क्याडेटहरूसँग प्रत्यक्ष अन्तरक्रिया गर्दै सामाजिक सेवा, आपत्–विपत् तथा विपन्न अवस्थामा समुदायका लागि अग्रसर भई काम गर्नुपर्नेमा जोड दिनुभयो।
सचिव शर्माले एन.सि.सि. क्याडेटहरू राष्ट्र र समाजका जिम्मेवार नागरिक भएको उल्लेख गर्दै विपद् व्यवस्थापन, सामाजिक सचेतना तथा मानवीय सेवामा सक्रिय सहभागिता जनाउन प्रेरणा प्रदान गर्नुभयो। साथै उहाँले NCC Alumni Association (NCCAA) को उद्देश्य, आवश्यकता, योग्यता, समितिको संरचना, काम–कर्तव्य तथा अधिकारलगायत समग्र विषयमा विस्तृत जानकारी गराउनुभयो।
कार्यक्रमले क्याडेटहरूमा अनुशासन, नेतृत्व विकास, सामाजिक उत्तरदायित्व र सेवाभाव अभिवृद्धि गर्न महत्वपूर्ण भूमिका खेलेको सहभागीहरूको भनाइ छ। विद्यालय प्रशासनले यस्ता कार्यक्रमहरूले विद्यार्थीहरूलाई व्यवहारिक ज्ञानसँगै राष्ट्रसेवाप्रति प्रतिबद्ध बनाउन सहयोग पुग्ने विश्वास व्यक्त गरेको छ।