महेश सिंह लहान सिरहा-भगवानपुर गाउँपालिका–१ मा जलवायु मैत्री गाउँ नमुना समूह अन्तर्गत किसानको जीवनस्तर सुधार्ने उद्देश्यले गोठ सुधार, भर्मिक कम्पोस्ट मल तथा कम्पोस्ट पिट निर्माणलगायतका कार्यक्रम सञ्चालन गरिएको छ।
राजदेवी महिला कृषक समूह, बहुउद्देश्यीय कृषक समूहलगायत स्थानीय समूहहरूको सहभागितामा जैविक खेती प्रवर्द्धन गर्ने उद्देश्यले कार्यक्रम अघि बढाइएको हो। किसान स्वयंसेवक इजिरा कुमारी यादवका अनुसार वडा भित्र २२ स्थानमा गोठ सुधार तथा कम्पोस्ट प्रविधि स्थापना गरिनेछ।
कार्यक्रमबारे जानकारी दिँदै अभियन्ता उषा कुमारी सिंहले जलवायु परिवर्तनको असर न्यूनीकरण गर्न जैविक मल प्रयोग र व्यवस्थित गोठ व्यवस्थापन आवश्यक रहेको बताइन्। उनका अनुसार महिला कृषकको सक्रिय सहभागिताले कार्यक्रम प्रभावकारी बन्दै गएको छ।
बरिष्ठ किसान स्वयंसेवक सचिता कुमारी यादवले यस्ता कार्यक्रमले किसानलाई आत्मनिर्भर बनाउँदै दिगो खेती प्रणालीतर्फ उन्मुख गराएको बताइन्।
केयर नेपालको आर्थिक सहयोग तथा राष्ट्रिय कृषक समूह महासंघ नेपालको सहकार्यमा कार्यक्रम सञ्चालन गरिएको हो। महासंघका मधेस प्रदेश सचिव यामुन प्रसाद यादवले किसानका गतिविधि दिगो र गुणस्तरीय बनाउन निरन्तर अनुगमन गरिँदै आएको जानकारी दिए।
